#NSS個人
[GUEST] 人際感歎長文！！
純粹想感慨一下自己完全唔識處理人際關係，性格又差，雖然學到教訓，但愈大愈唔想同人交流，對大部份同齡嘅人完全唔知講乜，好少話題又冇共同興趣，識嘅人全部都有自己圈子，加入咗只會尷尬。但可能因為我唔識付出，搞到我冇乜朋友。
以前小學都有對自己好好嘅朋友，但之佢唔開心，好似係我從來冇幫佢慶祝生日，送禮物咁，又話我講大話，就鬧交，我就比其他人排擠。不過嗰陣已經小六，好快畢業，加上排擠只係唔同我玩，雖然有傷心過，但上中學就感覺冇曬事。
到中一嗰陣，唔知點解我覺得揾朋友一定要超級主動，所以迎新日就立即不請自來咁坐喺一個人隔離，下稱 A，格硬同佢開話題，仲記得嗰個人玩緊 minecraft，我都有玩，之後傾傾下就做咗朋友，真係好感恩，明明一開始只係白撞，但呢個人同我一齊睇鐘意漫畫，去我屋企，玩小學雞遊戲，一齊畫畫咁，都幾開心，之後第二學期又識多d唔同同學，有個小圈子。但老實講，小圈子入面有兩三個我都唔太夾，冇野講，但A同大家都有好多話題，當時圈子有 B，我同佢因為好多笑話講，我承認我當時偏心 B，分組都同 B一齊，逐漸就同 A疏離咗。過咗一段日子，我好抵死咁玩咗一個好唔應該玩嘅玩笑，B就離開埋我，我當時真係好低能，希望大家唔好學我。有d人成日話互損先係好朋友，會問候關心你嗰啲係假嘅，但大家要小心唔好超過，亦請珍惜會關心你嘅人。
去到中二，我啱啱好同一個幼稚園嘅朋友同班，同佢有講有笑，有話可惜當時我完全唔識包容，心入面唔鐘意佢一啲性格，但又唔夠膽講出黎，就用咗啲自以為是嘅方法迫佢，搞到佢喊，之後當然冇朋友做。
到中三，我唔慣喺同學面前一個人食飯或者一個人呆坐，就識咗幾個人，雖然都有d野講，但我同佢地冇共同話題，冇乜點玩，只係傾下咁。
到中四中五中六，我又識咗好幾代唔同朋友，有啲就完全冇話題，志在有人陪下咁，有啲就同圈入面幾個有野講，有啲就完全冇野講。
好多的確係自己攞黎，但係咁多年，已經愈黎愈內向，心有咩諗法實在唔想講出黎，已經唔想再識人啦，好攰，可能係我性格一啲都唔適合識朋友，甚至網上識嘅人，就算一開始有野講，最終都會散。唯有搵啲個人興趣等平時冇咁悶啦
希望大家珍惜有講有笑嘅真朋友，有共同話題真係好難架。
希望admin可以po ig, 多謝