#NSS個人
[Guest] 你地好，我唔係學生，但係最近發生左一件事，好想搵個平台發洩下，多謝admin同各位。
事源是咁的，約半個月前，我想話比個新客聽：升降機喺門口左邊。
一句好簡單嘅句子，喺我細小嘅腦袋運轉完之後，我對住個客：
「直升機喺門口左邊。」
直升機⋯
升機⋯
機⋯
直升機——係你有錢坐過；冇錢電視見過嘅物體。
升降機——係你除非喺「我巴西㗎碌柒」之類嘅地域出世，如果唔係都應該用過嘅物體。
喺講出口嘅嗰一剎那，喺我感覺到我同事們都喺後面望住嘅嗰一剎那，我知道，我社會性死亡咗。
突然，我都未尷完，個客就開始笑，笑得比冇戴口罩打乞痴仲大聲。
然後，我忍唔住，就同佢兩個人一齊拍腿大笑。
半個辦公室嘅同事，安靜咁睇住成件事。
世界咁大，我以為只會見到呢個客一次⋯至奇，前幾日，我又見多佢一次，今次佢帶咗位朋友嚟。
又差唔多係送佢哋走嘅時候，我心入面不停提醒自己，唔好再丟架。
升降機，升降機，升降機，升降機。
「我帶你哋去直升機。」
嗰一刻，我呆咗，佢哋都呆咗。
然後，喺加上佢朋友嘅又一陣狂笑之後，我聽到佢哋咬耳仔：「都話㗎啦⋯」
？？？？？？？係唔係我以小人之心度君子之腹？
我覺得我為自己嘅人生帶來咗污點。
我眾多同事都係目擊者，佢哋好好人，唔會開我玩笑。
但係，每一次我有任何有關升降機嘅事，總會有人好認真咁嚟提我：「小心啲。」
我已經就快逼到自己忘記㗎喇！！！！阿！！！點解！！！點解你哋要咁殘酷！！！
（JK, love you guys.）
另外，就算係邊度都會有八婆八公圈子。
我已經不下一次俾人惡意稱呼，包括但不限於「機師」、「差不多先生」。
完了吧⋯一切都係我咎由自取⋯
經歷完之後，我返屋企同家姐哭訴，我家姐問我：「點解你唔直接講『𨋢』？」
我呆咗。