#NSS個人
[GUEST] admin 唔該 post ig 🙏🏻
話說viutv出緊套新劇，我想同大家分享一下。👀
講之前，要先利申我中文唔係太掂 (作文好耐冇攞合格嗰種)，所以要先 sor for 1999。
好，然後就講落去。 套劇叫《大叔的愛》，而我想分享一下我對套劇嘅一啲諗法。
首先，我一直對港產片冇興趣，可能係因為屋企人一直以嚟睇tvb，而tvb嘅所有節目啊劇啊電影啊嘅質素都好似只有向下跌嘅趨勢。演員嚟嚟去去都係嗰幾個，演技又……一般。總言之就唔好睇，所以歐美、韓、中、日劇/片都睇，就係少睇港片。
我阿爸提起《大叔的愛》嘅時候我真係聽都冇聽，只係半留神，一邊睇手機一邊睄下電視 (所以到而家第一集嘅頭半部分其實都未睇過哈哈)。當知道係bl之後當然即刻要查，結果發現劇集仲出緊，然後因為香港冇出過lgbt+劇，我就諗哇如果佢哋真係嘴我會崩潰 (佢哋指田牧，嗰個阿叔就……最好唔好俾我見到佢同田田咁樣做🌚)。然後佢哋就嘴咗，然後我就崩潰(係好嘅崩潰)。
雖然話初吻親吻乜吻物吻我都睇到悶，但係我每次諗起第三、四集嘅劇情就超級超級開心。本身鍾意睇bl係一件事，但係呢個係香港第一部bl劇，而且有表白！會錫 (睇慣咗陳情令嗰啲就唔會期望咁多)！我真心覺得呢套劇開咗一道門。雖然唔知lgbt+劇幾耐之後先會再喺香港出一套，但係我覺得《大叔的愛》有啲似綠燈，同香港講「ok！出bl劇係可以嘅！而且會受歡迎！」我真係好敬慕好佩服《大叔的愛》嘅製作團隊+演員。
返到我得知《大叔的愛》嘅存在嘅幾日前，我咁啱喺度諗緊如果香港有一日出lgbt+片就好，而係真係開放，冇需要經過審查制度嗰種；但係都唔知我死之前有冇機會睇到，香港能唔能夠發展到呢個地步；因為始終呢度仲係有無數會歧視/唔接受有唔同性取向嘅人，而製作一部電影/劇集需要好多好多人，係好多好多接納lgbt+而且悉指揮、拍攝、演戲等等嘅人聚集埋一齊去完成。點知，答案係會！重要係幾日之後咁快！
重點就係，我好想分享我嘅興奮同感動，因為我身邊嘅人似乎都好似唔係好明我點解覺得呢套劇係咁大嘅一件事。
喺香港呢個連同性婚姻都仲係犯法嘅地方，同陌生人相處都會因爲怕俾人批評會先假設對方係一個歧視者，以免講漏嘴嘅地方，我竟然有機會喺度見證住一個珍貴嘅、勇敢嘅、歷史性嘅突破，我覺得非常非常感恩。
圖Link: https://www.linkpicture.com/q/B4927A48-BFBF-4364-ACA4-5DF2C59DD1BC.jpeg