GUEST

#NSS其他

[GUEST] 麻煩哂各位Admin，以下正文：
（全個人意見）
覆返#NSS210703U1
你提出嘅「亂倫點解唔得」呢個問題，其實係可以被討論嘅，但我哋必須先理解同分析亂倫嘅不同方面，可引致嘅後果，以及呢啲方面同後果嘅可接受程度。
係我嘅角度嚟睇，亂倫可以分成情感上同行為上。情感上嘅亂倫，簡略啲講，其實即係親屬之間所產生嘅戀愛情感。呢種情感同親情係唔同嘅嘢。親情係講緊親屬之間嘅互相信任同依靠，所帶比你嘅係安心、被接納、安全、可放心展現自我嘅感覺；而亂倫係以個人感受為主嘅一種對他人嘅依賴、依戀、愛慕同渴望，但係呢個情況之下嘅「他人」係你嘅親屬。呢樣嘢所帶比你嘅，除咗頭先提到嘅親情可帶比你嘅嘢之外，仲加上咗愛同埋慾望。
行為上嘅亂倫呢，一句講哂：與親屬發生性行為。點解呢度冇包括嗰啲咩「與親屬行街食飯睇戲擁抱錫錫送花」之類嘅嘢呢？因為如果你唔以亂倫嘅角度嚟睇呢啲行為，其實佢哋全部都可以係因親情而作出嘅舉動（錫錫就見人見智啦，但關係好嘅/親密嘅都會做嘅），但性行為就一定唔係，所以我先抽佢出嚟講。
本人認為，情感上嘅亂倫，係可以被接受嘅，但行為上嘅亂倫則萬萬不可。係我哋自小被教育「亂倫是錯誤的」呢個概念嘅環境之下，仍然可以產生呢種情感，就證明佢（用個代名詞可以更清楚解釋）對嗰個親人嘅愛係非常、十分、極之濃烈，濃烈到超出咗道德可接受嘅範圍。既然情感上嘅亂倫並冇寫係犯法（法律只講明係發生性行為先算違法），而佢又冇越軌的話，就放佢一馬啦。但係，當佢作出咗行為上嘅亂倫嘅話，咁就不可被接受，因為佢所引致嘅後果係非常之嚴重。
行為上嘅亂倫所帶嚟嘅後果大致可分為三個：刑事責任、懷孕同家人嘅負面觀感。首先，與親人發生性行為係法律上嚟講係犯法嘅，刑罰係可判處監禁14年（如果女方嘅係16以下，13以上，則可判處男方監禁20年）。違法唔只係坐監，冇自由失自由，傷心痛心眼淚流（sor）之外，仲會留案底，對雙方嘅整個人生都有好大嘅影響。第二，萬一真係懷孕，基本上嗰BB一定唔留得，呢件事唔只係原文所講嘅「落咗佢就可以」咁簡單，而係一個生命嘅犧牲，同埋父母雙方（即亂倫雙方）嘅陰影。試諗下，若果因呢件事而要落仔/令人哋要落仔嗰個係你，你嘅心會好過咩？就算個BB係未出世，佢都係一個因你哋嘅錯誤而無辜犧牲嘅生命，難道你餘生真係可以擺脫到呢個陰影咩？當個BB真係留得低（which is我呢一世人發夢，用屎忽諗嘢，甚至痴Q咗線都唔認為會發生嘅情況，但當真係發生咗先啦），如原post留言不斷被提到嘅，係生物上，近親繁殖會造成基因缺陷，對BB有極大嘅影響。如果生咗出嚟嘅BB係有肢體或/及精神上嘅缺陷，佢嘅人生一定會十分艱難，而呢個結果正正係由你哋嘅錯誤所造成，唔通你哋又可以承受到咁大嘅負擔咩？第三，就算佢哋真係十足十楊過小龍女咁擺脫世俗框架，非對方不愛，但其他人唔係咁諗㗎嘛。其他親戚係發生性行為之前仲可以話佢哋嘅相處係親密嘅表現啫，但一米已成炊就百分百肯定係亂倫。呢個後果唔只會對屋企人造成心理上嘅極大打擊（亂倫喎，大過臭氧層個窿都不為過），仲會令佢哋係家族之中冇立身之地（試問有邊個可以接受到自己屋企人亂倫呀）。係呢啲後果之下，行為上嘅亂倫係萬萬不能嘅。
相信打咗咁多，大家都明白我對亂倫嘅睇法啦。咁就…開新topic（睇多一陣！唔會阻好耐㗎咋！各位大佬俾啲面我！）
原文就將亂倫同LGBTQ+相提並論啦，咁係我角度嚟睇呢…點得㗎？！LGBTQ+之所以會受人哋一面倒支持，係因為現代社會對LGBTQ+嘅觀感絕大部分都係歧視同反感，而佢本身係冇錯嘅；而投有關LGBTQ+稿嘅人，可以係咁多負面觀感之下企出嚟講呢件事，值得所有人鼓勵，先會受到一面倒支持。但係，亂倫係完全截然不同嘅嘢，呢件事係道德上、社會上、法律上，都係一件錯事（不過我就認為…睇返上面），係對社會大眾嘅一個禁忌。所以，佢哋兩個嘅本質根本就唔同，原文又點能夠將佢哋擺埋一齊講呢？所以，係投稿之前，睇一次篇文，諗下係咪真係講得通，先㩒submit掣啦，無謂嘥Admin們同咁多人嘅時間，係咪？
完（真係完）
麻煩哂咁多位Admin🙇
多謝各位大佬俾面小弟，願意睇到最後🙇
初次投稿，如有1999，敬請見諒🙇