#NSS家庭
[guest] 小妹今年form 1，由細到大都同阿媽關係好好，平時學校發生咩事都會同佢講，甚至連考試肥咗都會放學即刻同佢講，而且佢都對我好好，平時我做錯野佢都只會用WhatsApp同我講道理，唔會打我，我知道阿媽係對我好好，但係阿爸就好唔同
我知道要個堂堂大男人用WhatsApp同你講道理係幾乎冇可能嘅事，但係我每次做錯少少野，阿爸都會大聲鬧我同打我。我有一次洗碗洗漏咗隻筷子，佢就衝入嚟我房，攞條藤條打我，一邊鬧一邊打，我想講做家務係我應份嘅，我都有幫手，洗漏咗一隻筷子姐，等陣洗返咪得囉，打我做乜，如果我做咗D好錯嘅嘢，佢大聲鬧我同打我，我接受，但係呢啲芝麻綠豆嘅小事都要打，我就絕對唔接受
佢仲好偏心我阿哥，阿哥大我八年，我哋嘅關係應該係鬥氣冤家，好小事都會鬧交，過咗一陣又會和好，平時我哋都會一齊捉下棋，關係都算唔錯。我同阿哥平時輪流做家務，有一次佢唔記得咗洗衫，不過一次半次我都會幫佢洗，之後阿媽發現咗我幫阿哥洗衫，佢就同阿爸講，我聽到阿爸話唔緊要，阿妹應該幫阿哥做，我嗰陣真係嬲到想打佢，咩我應該幫阿哥做啫，之前明明講好咗規矩，不過阿哥一時唔記得做好正常，我理解，但係阿爸咁樣幫佢，真係太過分，我嗰陣以為佢只係一時想幫阿哥，點知我有一次唔記得拖地，佢就鬧我同打我，真係好唔公平囉，之後我阿媽同阿哥幫我講說話佢都唔理，有冇搞錯
呢排我覺得佢越嚟越過分，所以平時都盡量避免同佢講嘢，費事自己情緒失控搞到又比佢打，唔可以益咗佢，不過佢最近成日雞蛋裏挑骨頭，不停搵我啲錯處然後針對我，我覺得我一世唔出聲只會令到佢更加過分，但係出聲又會俾佢打，呢個怪物一路進化，受害嘅始終會係我，我唔知點做好，各位有冇啲意見比我？另外我覺得我嘅容忍程度有限，遲早會爆發，爆嗰陣我真係唔知自己會俾佢打成點，我而家好迷惘，希望各位可以幫吓我
admin pls post ig
thx everyone