#NSS其他
[GUEST] admin麻煩po ig✊
大家好，我知我要講嘅嘢其實好多人都明白，但都希望可以喺度講一講讓座呢樣嘢。
其實各位有冇諗過讓座純粹係一件幫人會做嘅好事，唔係任何人嘅義務。一個人唔讓座俾個阿伯，你可以話佢冇良心，但係佢真係冇錯。
當然，我唔係想叫人唔好讓座，畢竟讓座嘅目的係要幫助有需要嘅人。但一個人有冇需要係咪一定睇表面睇得出？
例如老人家、阿公阿婆嗰啲，就係睇得出、大家都知嘅「有需要嘅人」。又例如隻腳跌傷咗、頭暈頭痛眼花、嚟M經痛嘅女仔，呢啲就係我哋睇唔出嘅同樣「有需要嘅人」。
我想講嘅係，其實人哋唔讓座真係冇得鬧。老土啲講句，佢讓係好心，唔讓係本分。況且公共交通工具嘅座位本身就係俾乘客坐，人哋唔想讓你都冇得迫。
仲有，讓座並唔係淨係得年輕人要做。雖然睇得呢個page嘅都係年輕人，但係都想講吓其實讓座係個個都可以做嘅嘢。正如我頭先所講，唔係淨係得老人家先係有需要嘅人。如果你見到隔離嗰個學生掛住玩電話，前面又有個婆婆企咗喺度，咁都唔好覺得一定係個學生要去讓座，佢唔讓唔代表你都唔讓等佢讓。
最後就係，如果冇病冇痛冇苦衷，咁都麻煩你讓返個位俾真係要坐嘅人。