#NSS個人
[GUEST] 我係一個好矛盾嘅人
如果我係朋友嘅印象中，大概會係嗰種成日衝出嚟柒，柒得嚟可以令大家笑得開懷嘅開心果角色。可能我喺佢哋嘅印象就係咁表面。
雖然佢哋對我嘅印象依然停留喺搞笑、on9，但其實都係無可奈何。因為我唔知幾時開始就迫自己戴住一副小丑面具，無辦法畀其他人見到人設以外嘅自己，我覺得真正嘅自己必須要同朋友眼中「真正」嘅自己徹底分割，所以可能連同我做咗五年frd嘅人連我鐘意追咩星、鐘意睇邊套動漫都未必知。簡單嚟講，我似乎唔識、又或者唔敢畀朋友過度深入了解自己。
加上我由細到大已經好識睇人眉頭眼額，原本應該呢個都算係一個優點，但係我會好容易因為人哋一個細微嘅表情、語氣向負面方向諗。同朋友表現得開朗嘅同時，亦一直小心翼翼咁同佢哋相處。因為我好驚我嘅一言一語會唔小心得罪其他人。我呢種性格確實能夠識到好多朋友，但係深交嘅朋友可能一個都冇。
不知不覺間我成為咗一個好在乎他人想法嘅人，因為大家都覺得我係脾氣好嘅人，所以好鍾意同我講笑，但係有時朋友講笑一句都可以令我在意好耐，「哇！XX你真係超肥喎！」明明知道佢哋講緊笑，但係佢哋呢一句講咗三秒鐘都唔駛，咁就足以令我煩惱三日。可能你會覺得我蠢，遇到任何友誼問題一律絕交啊嘛，道理我都明白，只係如果我無咗呢班朋友，感覺我就無人會需要我，如果他人嘅快樂喺建基於我嘅痛苦，倒不如令我痛苦落去。
平時唔好意思喺自己Ig 放負，擔心嚇親班frd，唯有喺度發洩下😂無論如何，多謝讀到呢度嘅你哋❤️