#NSS社會
[GUEST] 麻煩admin po ig 唔該唒你哋🙏🏿
小妹今年15歲 最近去咗麥當勞翻part-time 遇到啲難題想請教下 喺下面簡單講下成件事來龍去脈先
（利申 今日啱啱做第三日）
第一日翻工 經理安排我跟個阿姐(下稱老屎忽)學整嘢飲 初頭都覺得冇乜嘢 點知過咗冇幾耐發現原來個阿姐係個老屎忽嚟 問親佢嘢次次都晦晦氣氣答我 ：係啊 啱啱咪教咗你囉 跟住又阿吱阿咗喺度話我啲嘢飲整得慢
第二日翻工 經理一樣安排我繼續跟老屎忽整嘢飲 然後老屎忽淨係企喺後面撓住手睇我斟嘢飲 跟住係咁話我整得慢 重點嚟嘞 佢嗰日同我講：噚日咪教咗你凍咖啡要撳杯蓋(因為麥當勞有好多款飲品 啲員工要靠睇個杯蓋嚟認執邊杯俾個客)跟住我就同老屎忽講：我冇印象你噚日有同我講過(事實佢真係冇) 老屎忽就話：咁你宜家有印象啦 唔好俾我見到你聽日又係咁
第三日翻工 我一樣都係繼續斟嘢飲 老屎忽一樣都只係企後面撓埋手睇我做嘢 得閒就同啲人打牙骹 後尾做嘢嗰陣聽到佢周圍同其他人講自己有教我「凍咖啡要撳杯蓋」但我屈佢冇教過
個人認為佢咁講嘢勁不負責任 搞到勁多人宜家對我印象好差
想問下對住呢啲老屎忽應該點做 老實講我真係好憎佢 但個經理叫得我跟佢學嘢咁我就要聽佢枝笛 唔想咁樣受佢氣又要俾佢咁樣周圍唱 但我又唔可能頂撞佢 所以想請教下有冇邊位師兄師姐之前有做過麥當勞或者有面對呢啲老屎忽嘅經驗
我自己係有心繼續做落去 但對住呢個老屎忽真係做得好唔開心 我都有諗過做多排就唔撈 但好多嘢都冇得咁樣逃避 今日避得過呢個老屎忽第時都總會再遇到呢種人 所以希望各位有經驗嘅師兄師姐可以指教下
另外 見麥當勞啲員工個個相處幾和諧 個個有講有笑 得閒又會打下牙骹(仲要好多都同老屎忽勁frd) 想問其實要做幾耐先同啲同事混得(我自己社交能力唔太強) 因為翻part-time其實都係想學下點同人相處同人合作 強化下啲社交能力 同埋始終同其他人關係好做起嘢上嚟都開心啲方便啲
好多謝你哋睇到嚟呢度
麻煩唒admin🙏🏿