#NSS學校
[GUEST] 其實名氣對於學生係咪真係咁重要?
相信每一間學校嘅每一級, 都會有最出名嘅一班人, 而嗰一班人關注度亦都相當高, 做咩都會好多人留意.
我有一個好朋友, 兩三年嚟都對大家好好, 但係近呢幾個月, 佢越嚟越黐埋去最出名嗰班人, 成日借啲意一齊玩(佢同嗰班人嘅某幾個人好熟), 呢個都唔係問題, 個重點係, 佢對我越嚟越冷淡.
如果你問我有冇呷醋, 咁我當然有啦, 但係我而家個感覺主要係, 我為佢付出嘅時間同心機, 都被名氣打敗咗, 之前問佢如果嗰班人邀請佢一齊玩, 佢會唔會接受, 佢好肯定咁話唔會, 但係而家即使人哋冇邀請, 咪又係成日黐埋去.
我同佢近排疏離左少少, 因為我覺得好攰, 我唔想再單方面付出, 而同時間睇住佢地一齊玩. 佢平時都好想出名, 好明顯佢係因為貪慕虛榮先成日黐埋去, 我有諗過同佢講我嘅諗法, 但係我驚會同佢炒大鑊, 始終佢可以隨時轉去同嗰班人玩而放棄我, 我想問除咗坦白之外, 我仲可以做啲咩先可以挽救呢段友情? 同埋想問名氣係咪真係咁重要?