#NSS社會
[Guest] 長文慎入
唔好意思呀各位，本人係一位耶撚，而呢篇野係關於自己對於同性戀嘅睇法，所以大概會得罪好多人，不過始終有啲嘢想同大家表達下，要插就睇完先插啦。
首先，如果各位LGBT曾經遇過一啲歧視你哋嘅基督徒，或者聽過一啲過份嘅言論，咁我就藉呢個機會代佢哋講聲對唔住。雖然呢個唔可以成為包庇佢哋嘅藉口，但係人誰無過，部分人的確會因為自己係基督徒而自以為高人一等，唔記得自己都係一個普通人，口出狂言，所以希望大家唔好太執着於佢哋。
而係同性戀方面，對於本人黎講呢種行為係有罪嘅，睇到呢到請各位大大唔好嬲住，睇埋落去先，俾個機會我解釋下點解我唔係歧視緊LGBT(至少唔覺得有歧視)。用個例子黎講，當有人偷嘢嘅時候，你會話佢做錯嘢，但係你唔會話你歧視佢。同樣地，雖然我認為同性戀係有問題，但係除此以外我唔會對佢有其他偏見，大家都只係性向唔同嘅路人甲，而同性戀亦唔係所謂比較嚴重嘅罪。人與人之間本來就有唔同嘅價值觀，希望大家唔會因為我對同性戀有意見就話係我歧視緊人哋。如果大家只係因為意見不同而不相為謀嘅話，咁就其實唔駛再同其他人相處喇喎，大家都有唔同嘅意見。
至於點解我覺得同性戀係罪，咁就牽涉到利未記、創世記、所多瑪同埋啲咩有違上帝創造嗰啲聖經嘅立雜嘢，冇興趣喺到講經，所以容許我忽略呢part。而關於點解明明我哋可以唔理同性戀呢個議題，我哋仍然跑去插一腳落去。其一就係因為我覺得有問題啦，而其二，更加主要係因為同性戀嘅普及會影響更加多人，甚至基督徒自身嘅價值觀，羊群心理效應又好、更加大機會接收到對我黎講錯誤嘅價值觀又好，所以出於自私，我先至會出黎咁明目張膽咁反對，唔想影響咁多人。請原諒我嘅自私
最後係到同大家講幾句微見啦，大家都係人啫，唸法都一定有唔同，希望大家唔好一聽到基督徒呢三隻字就針對佢哋，基督徒亦唔好一開波就對同性戀有偏見，at least嘗試理性溝通下，消化下大家嘅唸法。一個人並唔可以用一個價值觀或者立場黎定義佢個人㗎嘛。
上述只屬個人意見，宜家想鬧就鬧啦