#NSS學業
[GUEST] 我以前真係冇諗過讀書真係咁重要。
我小學同中學都係全中,粵語教學，我以為全港都係咁。後尾到中三，聽同學講學校係band 3，先有banding概念(當時老師話係band 1尾,band 2頭，其實係band 2中)。
不過我覺得間間學校都係咁教架啦，有分別咩？所以當時冇乜感覺，亦都理解唔到d同學咁大壓力做乜，好似前世冇考過試咁。
直到最近我先發現原來香港大部分同級中學都5係全中，通常band 3先係全中文教學，又發現原來自己覺得好深嘅英文字，對小學生黎講係好簡單。我開始明白點解佢地咁焦慮…雖然唔係全英，但有英文語景總比沒有好，單係呢樣已經輸人九千條街。
而且有d好現實嘅人一聽到你校名，態度都好唔同。之前參加過表弟嘅中一家長講座，到提問環節個陣，有位家長問:「請問中學會唔會有校車接送？」點知個副校竟然話「只有有公主/王子病嘅小朋友先需要校車接送，佢地宜家係中學生應該要識得自己搭車番學。」串完個個家長個小朋友有病之後仲串埋個家長，鬧佢地係怪獸家長，仲叫其他家長唔好學佢地。
呢件事簡直刷新左我嘅認知，我都係第一次見到咁嘅情況，聽講被人串嘅家長個小朋友黎至好差嘅學校，佢向校長投訴，個校長一聽到校名即刻唔理佢。
之後聽表弟講，話考分班試嘅時候，個副校長同佢地講入唔到精英班嘅都係廢柴。
Btw因為表弟係一間唔錯嘅小學出黎，d老師對佢地十分之有禮貌。但同時我深切感受到自己嘅處境有幾惡劣，我開始羨慕佢有肯為佢前途著想嘅父母，我讀嘅幼稚園同小學都係因為近而讀，小四嘅時候開始，我就自己一個人處理所有野，包括升中。當時我唔知有派位呢樣野，但我想讀其他中學，但父母話派位好多野搞，好麻煩，所以係通告揀左直升。當時我冇乜所謂，但宜家覺得自己已經輸左，呢隻game已經玩唔落去。
尤其是成個家族得自己一個唔係讀band 1學校，得自己嘅父母完全唔關心子女嘅前途…..之前聚餐(疫情前)個個父母都話自己個仔/女入左咩咩名校，問我父母嘅時候，佢地仲笑笑口咁答人地，完全唔知人地響度攀比緊，人地聽完校名即刻唔理佢，佢仲響度撘傘r水吹，真係好肉酸。
有次我攞全級第一，我爸將獎狀po左上fb，d人竟然係恭喜另一個親戚嘅小朋友(佢讀band 1)，明明張獎狀有我名，仲叫我好好向佢學習….
所以…大家努力d讀書，否則被人睇唔起嘅時候，你都反駁唔到人地。唔知大家有冇睇過三流人生，雖然唔會好似主角咁有大團圓結局，但會好似佢地咁俾人睇唔起。