#NSS個人
[guest] 求admin po ig🙏🏻🙏🏻
*長文慎入
大家好，自我介紹返先，小妹今年中一(準備升中二),讀Band one學校(唔係想攀比啲咩純粹交代背景)。
好似係由form one下學期開始，喺無形之中我好似俾咗好多壓力自己，而我係不自知嘅。嗰陣時就係差唔多要考試，咁我都好似平時咁開始溫書啦，一開始都冇乜嘢，但係去到臨考嗰幾日我嘅情緒就開始有少少失控(試過散散吓步然後返到屋企之後爆喊，但係嗰陣時完全唔知點解，因為本身屋企人比嘅壓力都唔係好大）。咁當初我都好自然咁認為純粹係緊張所以先會有啲壓力姐。其實我自問我今次嘅考試都真係投放咗好多心力，正所謂一分耕耘一分收穫，但係今次考試失準咗少少，對自己都有啲失望。我以為考完個試就一天都光晒，咁之前爆喊嗰幾次都冇乜嘢啦。但係之後就要籌備我嘅小提琴考試，呢個就係惡夢嘅開始。
本身自己唔係真係好有音樂天份，但係學小提琴都學咗好多年，不過始終對自己冇乜信心，總之就成日都覺得我拉得好差(阿媽都有讚過我一兩句so idk)。回應返啱啱講嘅嘢，呢排就要準備考試。第一次練琴爆喊嘅時候係我練練下琴拉極都拉唔到句句子，跟住我就諗住冷靜下，坐低咗係地下度然後無啦啦開始爆喊，仲要係停唔到嗰隻。自從嗰一次之後我就一發不可收拾，由本身一個禮拜喊一兩次變到依家每日練琴就每日都喊。最恐怖嘅係，喊嘅時候會好嬲自己點解拉極都拉唔到，將啲琴書同埋其他立雜野抌晒落地下，再坐喺地下度慢慢等自己喊完冷靜，攞返起部琴繼續練。依家每日都要練琴，所以基本上每日都會喊（除咗學琴嘅時候）。有時坐喺度都會喊，會覺得自己真係好廢，明明乜嘢都冇做就喺度喊。喊嘅時候就會呢埋喺廁所度強迫自己唔好喊，真係覺得自己好玻璃心。有時仲會想自殘，不過基於我冇呢個膽量，所以都冇咁做過。
老實講我唔係太清楚自己發生啲咩事，而我亦唔知自己使唔使搵心理醫生傾兩句。究竟我發生啲咩事，真係同以前好唔一樣，有冇人可以話俾我聽😢就算之前同父母講過，佢哋都有安慰我，但係之後都好似冇好轉過，仲惡化左。
(身邊嘅朋友都覺得我係一個樂觀嘅人，連老師都係咁講…所以情緒崩潰呢樣嘢真係意料之外。加上以往成績都唔係話特別好，父母俾自己嘅壓力都唔大，所以「好大壓力」呢四個字好似唔會出現係我身上咁。當佢嚟到嘅時候都唔係好識應對 😞多謝你哋睇到呢度，祝你地生活愉快)
Sor for 1999
求各位屌細力啲thx