#NSS愛情
[GUEST] [文可能有啲長]
小妹今年18歲，03年應屆DSE考生，有啲感情煩惱希望大家俾啲意見我。
我鍾意咗一個男仔差唔多成十年。三年班嘅時候佢轉學嚟我班，一開始淨係覺得呢個男仔幾靜性格幾好，冇咩印象。點知開學第一個雙人Project就同佢一組，因此變frd咗。因為佢係轉學生冇咩新朋友，我就變咗學校裏面同佢最frd嗰個。至此之後我哋成日形影不離，我慢慢變得越嚟越想見到佢，越嚟越黐佢。而好幸運地我之後嗰幾年都同佢同班。
到大約五六年班，開始大個踏入青春期，我慢慢意識到我對佢係超越咗朋友嘅鍾意。但我當時覺得咪又係小學雞嗰啲puppy love，好快冇㗎喇，又唔會長遠，大個咪又散，所以冇諗咁多。
我哋中學係直升書院嘅，而且好好彩我又係同佢同班，而且中二中三仲連續兩年一齊坐，我對佢嘅感情有增無減。而呢個時候佢都冇咁內向，識多咗好多朋友，其中同一個女同學行得特別近，我開始有啲小呷醋，但畢竟唔係佢邊個，所以所謂嘅呷醋都係玩下啫，點知佢竟然好認真同我保證我係佢最重要最好嘅朋友，係佢嘅知己。我嗰陣時覺得幼稚得嚟，內心仲有啲開心。
高中揀科，我文學同地理比較叻所以揀咗文科，佢數學同Phy Chem Bio都幾好所以揀咗理科，加上唔好彩地唔同班，所以喺學校基本上冇交集。但我哋weekend或者假期都會約出嚟玩，都成日打電話傾偈，所以中四中五，甚至疫情間感情都冇斷。即使中六忙於DSE溫習感情有淡咗啲，但都係彼此最close嘅朋友。我亦都諗得比以前更長遠，呢三年我諗咗好多，雖然未係話咩談婚論嫁，但係起碼會諗如果唔一齊讀大學，大家出嚟做嘢會點之類。我亦都糾結咗要唔要表白好耐。
早排放榜，我嘅成績比預計中更好，都讀到心儀嘅科。我開心之際佢突然話要移民。係冇任何預兆跡像，有日佢突然同我講話移民。我當下好錯愕，呆咗。佢同我解釋，已經諗咗好耐，身邊同學朋友都知，淨係冇話俾我聽。
我呢下更唔肯定要唔要表白。因為我家姐有經歷過Long D分手，我自細就唔係一個勇敢嘅人，我驚我都會係咁，唔敢保證我哋唔會散。而且我諗翻起，呢十年佢都將「朋友」呢個身分掛喺嘴邊，好似我哋嘅關係永遠淨係咁，有層無形嘅牆。我驚表咗白連朋友都冇得做。
我而家真係好猶豫糾結，佢九月就走，我唔知點算，希望大家俾啲意見我。
Sor for 1999🙇♀️