#NSS家庭
[Guest] 對住老竇真係同拆炸彈無分別
長文慎入
小弟今年16歲，有個時冷時熱既老竇。其實咁耐以黎同佢相處都唔係咁樣，淨係細細個可能同老母有爭執（關於買樓同埋少少感情問題）而發癲咁「咆哮」。我都知呢個係一個非常正常既現象，不過佢呢排真係轉差左好多。佢自從轉左兩次工之後成個人變左咁，我小學果陣佢係我心目中都係一個有學識，包容體貼同埋比較幽默既老竇。
估唔到，依家佢已經變左一個成日開車就問候人老母，日日起碼食半包煙，成日凌晨唔知去左邊，成點幾兩點先翻黎（佢第二日要返工）。成日呢頭開心完果頭就怒髮衝冠，家陣股票幾十萬上落啊⋯⋯同佢自己啊爸啊媽須然相處落都係孝子黎，不過隨著我啊爺啊嫲年紀開始大，成日同佢地講野我老豆都好似好唔耐煩咁，等多5分鐘就已經滴唒汗嘆氣。
我都明白佢工作壓力好大，尤其是依家個市咁樣，不過我就覺得佢唔應該將累積埋既壓力發洩係自己親人身上。剛剛寫呢個post之前，打算好地地同佢打陣機，又嫌個冷氣熱係咁話我打機點樣唔專業法，點樣拖累佢，根本上就係格硬講，跟著明明買左個叫做涼既Dyson風扇，係要發老脾係咁打個客廳冷氣機，拍到冷氣葉都飛埋出黎。
遲下我去外國讀書，工人又完約，屋企得翻老竇老母兩個人肯定唔掂。老竇就每日翻到黎屋企一個人都無，自己食煙飲酒發脾氣自暴自棄咁款，老母就又話呢樣藉口果樣藉口隔日先翻屋企，咁搞法頭家真係唔死都收皮啦⋯⋯
依家我仲有三個禮拜就走，我真係唔想放假返黎香港見到老竇老母已經離左婚，分居，了斷，事關啊爺啊嫲都真係好錫我，真係唔想明明一個家庭變左要兩頭撲。到底有無任何解救方法定係已經死梗？
（PS 以上講述既問題其實已經唔係一日半日發展成既事，係呢5年黎一日差過一日，到到今日我見到我老豆咁Q樣無理取鬧我先頂唔順出post，因為始終佢對我既期望都好大，我都好感激佢咁多年黎真係對我既正面付出，只不過佢精神上既問題咁樣我真係唔忍心）