#NSS家庭
[guest ] 家庭影響對一個人真係好重要
以下係分享我嘅家庭對我自己嘅影響。
先講我嘅背景，我係來自基層家庭，我父母係比較遲生我，所以到我依家中五嘅年紀，我老豆年紀已經好大。我老豆同我親生老母喺我好細個就離婚（其實背後都有好多因素，包括年齡相差好大，性格不合等），我就跟咗我阿爸。不久，我老竇就識咗一個女人，佢哋年齡都好相同，佢哋都有好多共同嘅話題，亦都好遷就對方。另外，我同佢嘅關係都幾好，因為我好細個就已經識佢，所以都有感情，佢亦都有當我係親生女咁養。
諗返起我細個嘅童年，雖然家庭狀況相對來講或許比其他家庭會好啲，但係其實家庭教育對一個人來講都好重要，唔止你父母嘅關係，同時亦都要睇你父母係點樣教你成長。因為我係一個好內向嘅人，亦都好敏感，所以人哋嘅一舉一動我亦都會好在意，我亦都觀察過自己係細膽，唔識得去表達自己意見，天生就係咁嘅性格。
各位嘅父母係用乜方法去教育你哋呢？打？同你講道理？定係用鼓勵嘅方式去引導你哋？上一段都提及到我嘅性格，呢個性格亦都成為左我成長嘅障礙，因為唔擅長表達自己，所有嘢都會擺喺心入面屈住，所以慢慢就會變得好自卑，甚至會厭惡自己，好冇信心，做任何野都會冇乜勇氣。
雖然我係感受到屋企人係愛我，但係同時亦都對我屋企人管教模式有啲問題，我老竇係一個脾氣比較暴躁嘅人，好冇耐性，每次我一做錯少少野，佢就會用打 鬧 方法去管教你。慢慢我就變成一個做任何事都會變得小心翼翼嘅人，面對唔公平嘅事情都會默默承受，經常感到自卑。細個嗰陣，啲同學因為見我好恰，就肆無忌憚咁欺凌我，呢一段時間我都經常好大壓力，慢慢我就好唔鍾意返學。一向成績差嘅我，其實中間我都好想讀返好書，但係一諗到父母嘅種種打擊，乜事都做唔好，心入面就會出現「你唔得㗎啦」令我灰心喪氣。
不過喺但而家大個諗返，我老竇講嘢係好偏激，佢唔識佢用正確嘅方法管教自己嘅仔女，佢嘅袖手旁觀教育，亦都令我有一段時間係好迷惘，我嘅價值觀上都係偏向悲觀厭世。往好嗰邊諗，屋企人其實雖然唔識管教，但係佢哋都對我唔算太差，我鍾意食嘅嘢佢哋亦都會特登去整俾我食，我話想要嘅嘢，第二日屋企人就會買返嚟，出現係我面前，嗰一刻我感到好warm 。咁樣睇，我會感到有啲矛盾，應該要憎恨佢哋，還是愛佢哋？
好在，上到高中，我遇到一班好姐妹，慢慢我嘅性格亦都變得開朗咗，開始搵到自己，亦都有自己嘅諗法，先至慢慢覺醒起來。但係關於童年嘅階段，都令我嘅記憶難以忘記。
喺疫情期間，因為無所事事，我不斷都反思自己咁樣嘅性格係來自邊方面嘅影響，諗返起以前自己無心向學、處理朋輩關係又好惡劣，歸根究底，家庭嘅影響真係好重要。若果，我父母肯鼓勵我，唔會去用責備嘅語氣去教我，可以俾我放心咁樣講我自己嘅意見出嚟，我嘅性格會唔會因為咁樣改變呢？雖然之前都有話過我性格本身就係好內向，但係後天嘅影響都好大。藉此，希望以上我分享嘅經歷，亦都令你哋可以思考一下。
Sorry for 1999
圖Link: https://ibb.co/YbM6Yh4