#NSS個人
[Guest] Admin po IG please~
小妹有個關於友情嘅煩惱。喺中二嘅時候識咗個frd(下稱A)，佢好好人、好勤力、有禮貌又靚女，我都幾仰慕佢。不過有個問題，就係佢會喺背後講人壞話。
A有個frd同佢小學嘅時候就識，聽A講就覺得佢哋兩個好熟，會上對方屋企又一齊去旅行咁。嗰時A個frd識咗個男朋友，A就好羨慕佢啦，就同我講佢個frd又肥又矮又醜點都係佢出pool先啦，點解會係佢個frd先。跟住A又俾佢個frd嘅IG我睇，話佢個frd咁嘅豬排樣都有仔，之後又爆咗啲佢個frd嘅秘密俾我聽。
我聽到之後心都寒，我個樣比唔上佢(應該係平均值以下嘅樣)A平時雖然唔會話我靚女，但係都會話我cute，偶爾讚我某幅相笑得幾靚，咁樣起馬令我感覺佢唔會恥笑我嘅樣貌(因為我呢方面都幾自卑下)但係依家我唔知佢會唔會喺背後同其他frd笑我個樣，笑我嘅身材，令我好驚。仲有我哋平時傾計都會同對方講下自己嘅秘密，有時一啲好mean其他人嘅說話我只會同佢分享，但係佢咁樣爆佢個frd嘅秘密俾我令我好驚佢會同樣爆我啲秘密俾其他人，我真係唔敢想像。(我係咪太敏感)我覺得我同佢之間多咗一個我放唔低嘅防備心。
依家佢仲會同我講佢嘅心事，我都會盡力安慰佢同俾advice。我唔會將佢同我講過嘅心事爆俾人聽，但係我保證唔到佢會同樣咁對我，所以我再唔敢同佢講心事，久而久之，我同佢好似有啲疏遠咗。
我唔想同佢疏遠，但係我已經有啲唔知點同佢相處，有冇人有類似嘅frd?可唔可以教下我點做？