#NSS個人
[GUEST] 小妹今年17歲，由細到大阿爸阿媽當以事業為重，讀緊小學嗰陣父母一直將我交俾爺爺嫲嫲照顧，但係自從升中之後細佬出左世，就請咗一個工人姐姐嚟照顧我哋. 工人姐姐嚟嗰陣都係啱啱畢業，因為年紀都唔係話同佢差好遠，不嬲都同佢好friend. Form 1嗰陣好多煩惱，而我咩都會同佢講晒，我一直都當佢係我最close 嘅知心好友.
後尾升咗上form 2 開始學識化妝打扮，屋企自自然然就多咗一堆護膚品、化妝品同埋衫. 有一次，我貪玩幫從來唔打扮嘅佢化妝同埋襯左一套衫同佢一齊出街. 見佢咁開心，於是我就送咗件我好少著嘅top 俾佢，仲送咗一套用過一次唔太啱用嘅化妝品咁. 之後嗰幾日佢成個人唔同晒，從此之後好注重外表，就連落去買豬肉都要化全妝. 問心嗰句，佢真係靚咗好多，但係我覺得真係冇必要去到咁嘅地步，咁當然佢鍾意打扮都係佢嘅自由所以我都冇點出聲.
但係最近呢半年成日會有啲衫、化妝品甚至面膜嗰啲無啦啦唔見咗，然後又突然喺佢間房發現到. 譬如一啲衣櫃最底嘅冬天衫，有時候想揼走啲唔要或者唔啱着嘅衫嘅時候，就會發覺衣櫃好似少咗啲衫. 又或者有時候想用特定嘅某一支唇膏嗰陣，會搵極都搵唔到，但係過咗一兩個月之後，佢沖涼嗰陣叫我拎毛巾俾佢嗰時無意中喺佢衣櫃見到嗰支唇膏（PS 嗰支唇膏係limited edition. 嗰一下我冇篤爆佢，就咁算數. 然後上星期都係咁，我買咗一盒新嘅面膜，我好肯定我只係拆咗個盒但係一塊都冇用過，結果第二日少咗兩塊. 我有嘗試問佢有冇見過我啲嘢，或者係唔係佢幫我擺咗唔知係邊，但係佢每次都會話唔知，咁我都冇理由一口咬定.
老實講佢拎得走嘅嗰啲嘢都唔係我常用嘅，我真係覺得冇咩所謂，但係諗極都諗唔明點解要問都唔問就攞咗去. 如果真係好想要，同我講我都會俾，但係真係接受唔到每次問都唔問就拎咗去，仲要拎完之後冇交代. 不過真係唔知佢係咪有咩難言之隱，但係我真係覺得如果你連問我可唔可以要嘅勇氣都冇，就冇資格一蚊都唔俾拎左我啲嘢. 雖然唔係啲咩值錢嘢又或者貴重物品，但係如果拎之前講返句大家個心都安樂啲.
至於我同佢咁friend，首先唔會考慮同父母告狀… 但係仲諗緊點樣同佢講返成件事，又唔會hurt 到佢.
Sorry for 1999.