#NSS家庭
[Guest] Thank you admin
我係屋企嘅大家姐，有兩個細過我嘅。咁我最細嘅細佬宜家小六（我大佢四年），唔知點解越大越曳…話說佢呢一年幾迷上咗打機，日日返完學就對住部電腦，放假都係。因為我阿爸有管屋企嘅wifi，所以有時佢會閂wifi。然後我細佬就發脾氣，又喊又打咁係到打阿爸。之後仲唔覺得自己做錯，喺到話因為阿爸冇開wifi唔畀佢打機所以打佢…嗰陣我喺屋企睇到 超想喊……點解我會有個咁嘅細佬。
當我阿媽係細佬隔離嘅時候，我細佬就攞阿媽部電話嚟打機，有時阿媽唔畀然後佢就會搶阿媽部機。鬧極都唔聽，成日覺得自己好委屈，自己冇錯。呢年我唔知佢邊度聽返嚟啲粗口（唔會係我哋屋企因為冇人會講），開口埋口就一句，對住阿爸阿媽講嘢好冇禮貌，對住我工人就仲衰啲，好似自己大晒咁。幾個月前細佬偷咗我同工人啲錢去買佢打機啲嘢……（唔講幾多不過都唔少），屋企人知道咗就話想報警，但最尾都冇報，話畀次機會佢，條件不過係要佢溫書，同埋唔畀打機。但係幾個月嚟佢冇溫過一次書，仲係不停咁打機。
（我講嘅嘢冇一啲都冇誇張到）
細佬今年要程分，再咁落去乜學校都冇得佢入，如果操行再差，就真係冇學校想收佢……有咩方法可以救下咁嘅細佬……連阿爸阿媽都搞佢唔掂，我講多句細佬唔啱聽嘅就鬧我（好似佢係我阿媽咁）。我真係好無助，好想幫佢變返好但係我要點做……