#NSS學校
[某b1A男女校] Admin post ig pls
小弟今年中二，開咗學幾日，想呻吓一個阿Sir，佢教我哋班數學，同時係我哋班主任，佢真係懶到一個點囉，咁大家都應該知，高中要準備DSE, 中一要好好適應中學所有嘢，所以一般嚟講全校最廢最懶嘅老師都喺晒中二，新老師都係，不過新老師初來報道，又唔會咁大膽嘅
好啦入返正題，我個副班主任係新老師 (fresh grad)，好多嘢都唔知，但係feel到佢好勤力，亦都會問我地好多關於學校嘅嘢，雖然佢有時有啲甩漏，不過頭兩日嘅班主任堂就feel到佢根本喺度carry阿Sir, 選職位，收功課全部都係佢搞，而佢喺度講緊嘢嘅時候，阿Sir就坐咗喺老師枱度發呆，佢淨係會負責講啲我哋喺學校平時要做嘅嘢，例如平時上堂之前嘅安排 (幾時早會幾時升旗禮嗰啲), 咁舊年因為疫情比較嚴重，嗰啲安排根本都冇做過，我哋又唔知，副班主任又唔知，咁梗係由阿Sir講啦，基本上副班主任做到嘅嘢佢都唔會做
數學方面，佢都幾懶下，每次有堂都比功課，不過又唔改，上次派番本簿，有同學發現佢冇改到，就舉手問佢，佢話佢淨係會check我哋有冇做，答案嘅話我哋自己check，本書得final answer, 我哋根本唔知自己啲steps啱唔啱, 如果係解釋題嘅話，本書個答案剩係得yes/no, 好多人根本都唔知點做，好在兩個數學科長都會教大家點做，老實講我覺得佢哋做嘅嘢仲多過阿Sir囉
其實學校安排佢教我哋班我都明，始終放喺一班中二係對學校影響最細嘅，就算教得唔好，之後嗰幾年都可以補救，不過呢個阿Sir真係太懶
呢個page主要都係年輕人睇，不過如果你係老師，而又睇到呢篇文，我想同你哋講，你哋作為老師，唔好咁懶，我明白你哋只係打緊一份工，勤力唔係你嘅責任，不過你懶就係不負責任，你懶，會影響到一班學生嘅前途，當我求吓你哋，勤力少少啦
文筆可能有啲問題，請見諒