#NSS學業
[Guest] 放低咗band 1學生身份，
得唔到掌聲，但得到寧靜同温馨。
本人之前喺一間沙田band 1英中讀書。
今年頂唔順，遞form去新學校。
並唔係因為成績差所以轉校，只係覺得成績再好，但讀得唔開心嘅話，一切都只係徒然。 我嗰間雖然唔係好似曾肇添呢啲band 1A學校，但講到學習風氣，絕對唔會輸畀曾肇添。難聽啲講句，即係個個都讀到癲咗。
七點半返到學校，讀書，操卷，小息討論第時讀邊間大學，讀邊個學系，jupas收幾多分。放學返到屋企做完功課就溫書，溫完書就操卷。日復日，年復年。
中二嗰年，因為得罪咗同級嘅「大家姐」所以一直畀人針對。起初只係幾個人攪杯葛，後來就十幾個。中三，已經達到一班人。去到中四，超過半級人都針對我、杯葛我、甚至向訓導主任作故仔，話我考試作弊、話我喺街邊食煙、話我喺馬鐵講粗口……總之就係誣捏。
我中四呢年好麻煩，訓導組成日嚟搵我，又質疑我講大話，差唔多日日放學都嚟搵我。直到我家長打畀學校對質，情況先有所放緩。
雖然最後我都係清白，但真係好嬲。我自問盡心盡力盡意做好自己，冇對唔住呢間學校，冇對唔住禮堂上面四個大字嘅校訓，點解我會落得如斯田地？我唔知點解呢股風潮，點解可以好似病毒感蔓延得咁快、咁廣泛。我只係知道，由中二嗰年開始，我就一個人同全级孤軍作戰，我身邊嘅朋友，五隻手指數得曬。
好感恩，今年六月嘅考試，我有超水準嘅發揮。學校predict我 best5 >25分，我完全冇受身邊嘅人同事影響，一如既往做好自己。但對於呢間學校，我會覺得「好後悔嚟咗呢間學校」，浪費咗我四年嘅青春、汗水。其實成間學校上至老師、下至學生，以至學校嘅風氣都好有問題。呢間「名校」嘅精神大概就係「面對欺凌、事而不見、麻木不仁」？哈哈。我苦笑兩聲。
喺新嘅學校，我決定連名都改埋，希望有新嘅開始，有煥然一生嘅生活。雖然我好遲先嚟轉校，但係喺新學校有唔少同學都好幫我。而且唔會好似舊學校啲人咁多心機、咁多恩怨情仇，日日都好似上演宮心計咁明爭暗鬥。
而且老師都好因材思教，教我英文嗰個老師半夜12點都肯whatsapp覆返我嘅問題。新學校嘅同學成績雖然冇咁好，但係個個都好努力、上進，希望入到大學。我亦唔使浪費時間思考點樣唔好畀同學誣告，可以專心讀書，而且比之前更開心。
喺新學校讀咗幾個星期，唔使再見到舊學校面目可憎嘅訓導組老師、唔使再見到面目猙獰嘅「大家姐」同佢嘅手下，唔使再見到滿口是非、滿腦邪惡嘅壞同學。亦令我明白到banding 呢家嘢，其實一笑置之。有時候所謂嘅band 1學生，同新X安其實只係一線之差，甚至衰過沙田娛樂城嗰啲爛仔。作為一個過來人，除咗搭lift嗰陣見到街坊，佢問起我讀邊間中學，得到佢嘅稱讚之外，我諗唔到band 1有乜嘢好。
回想起喺舊學校嘅日子，一次次墮入深淵，刻骨銘心，一次次闖入暗夜，輾轉難眠。無數次跌倒，但討厭我、想我一敗塗地嘅haters令我倍感堅強。窗外一片漆黑，望著寂靜夜空中些少嘅月光，我諗返起一句話，「人生就好似一架碰碰車，雖然碰撞唔會少，但係永遠唔會停止步伐，never stop。」
共勉之。
圖Link: https://ibb.co/8rVQPvj