#NSS家庭
[GUEST] 本人係一個16歲中五學生
我有個管我管得幾嚴下嘅父母
佢哋超級睇重我嘅成績
只要入我間房見到我唔係温書就鬧我偷懶
佢地返工都會打電話返嚟叫我溫書
以前都規定我一個月只可以出兩三次街
出街都唔可以夜過9點
之前同friend出街唔小心九點四先返到就畀佢哋鬧到痴線
–
咁以家就拍緊第五次拖嘅
拍左拖一個月
因為其實佢住九龍我住新界
又唔係喺同一間學校
太遠所以只可以同佢一星期出去一次
(講返之前嗰幾任都係渣完全冇約過我出街)
而因為驚屋企人嬲所以一直冇話比佢地知我有拍拖
咁我就呃佢哋話係同friend出去
而最近經常為咗得到出街批准都會同佢哋嗌交
之後佢哋覺得我一個星期出去一次已經好密所以就懷疑我到底係唔係拍拖
亦都會經常試探性地問我到底有冇男朋友
咁有一次出街我就都係同佢哋講係同friend出去嘅
但係今次阿爸就叫我出到去同我班friends影張相作證明
今次反駁唔到就穿煲啦
咁呢我阿爸就願意同我解決事情嘅
佢偏向理性並以唔會影響成績為前提畀我拍拖
但係我阿媽就超級情緒化同脾氣差
想同佢和平溝通都唔得
仲要冷戰咗好耐
撩佢傾野佢都唔鬼理我
鬧我嗰陣時我反駁佢就黑我面
完全冇聽過我意見
仲話過要我停止呢段關係
但係我死都唔想分
佢地成日提佢哋經驗多明白咩先對我好
覺得拍拖一定影響成績
同佢哋溝通嗰時開口埋口都係DSE 大學
–
我覺得我係呢個家庭好冇自由
有時返屋企都好冇返屋企嘅感覺
甚至對我嘅屋企人有恐懼
佢哋強烈管理我成績
令到我對學習反而有更加大嘅壓力同焦慮
甚至有唔想返學嘅感覺
請問呢場世紀大戰之嗌交
我之後應該點做，點解決好