#NSS愛情
[某女校] po IG thankssss
⚠️長文警告⚠️
事情係咁樣嘅，小女今年中三，要講嘅係一個中一時第一個識嘅隔離臺 friend，叫A。
先講返D 背景，我小學中學都係係女校讀，完全沒有拍拖經驗。仲記得中一嘅時候一踏進課室就見度A係度睇書(唔好問我點解到宜家都記得)我本身個人好多野講，就去主動同佢傾計。嗰陣佢真係好靜好靜，同佢熟番少少嘅時候佢先講多左野，但係同我一齊都係做旁聽者。我地仲一齊認識左兩個frd, 叫 B 同 C 啦，B 同 C 因為都係隔離位所以佢地兩個比較熟，體育堂兩個人一組我都主動搵佢一齊。四人 Project 亦都唔會漏低佢。
講番正題，不知不覺就到左中二升中三嘅暑假，嗰陣太無聊，就搵B 同 C一齊玩線上版殘酷二選一，但係唔係平時大家玩開「糖同朱古力要一個你要邊個」嗰D，而係兩條比較難答嘅問題中選一挑黎答。有次 C 問我「如果係我地個 frd grp 入面而你一定要選個人同你拍拖你選邊個」嗰陣我二話不說馬上講係A。(仲有後續沒完，隔個行等大家讀得冇咁辛苦)
玩呢個殘酷二選一玩悶了，就玩真心話大冒險，我選了大冒險，C 就話要我係 wts 同 A 告白，要我cap 埋佢反應。當時我先係只有我地三個人嘅grp 嗰度作作「告白」用嘅句子，大概咁樣：「A, 我知道今日唔係D 咩特別日子，大家亦都準備要番學，成個暑假我都係度唸緊一件事，唸左好耐好耐。最後問左朋友嘅意見，我唸清楚了，無論結果點樣我都唔會後悔，A，我鍾意你」(大家可以當係告白稿參考😂)寫呢個稿好自然，就算我冇拍過拖都好容易寫到出黎，B 同 C 都大大支持，我就抱著玩玩下嘅心態禁開同A 嘅private contact。我一見到佢嘅千年都唔變過嘅頭像，我就開始明白度點解小說入面講臨到告白嘅時候永遠都會唔記得之前準備左咩。我之後同佢嘅「告白詞」都唔知講左 D 咩，一講完「我鍾意你」我就好後悔，心中唸住如果自己只係抱住玩玩下嘅心態，而佢真係答應我，我唔知應該點算好。最後我敵唔過我嘅良心，就同佢講番係 truth or dare，佢鬆左一口氣。但係我八卦，我都想知道佢當時唸緊乜，所以就 invite 佢入黎我三人 grp。C問佢其實佢本身想點答，佢話會同我做情侶，因為唔想我唔開心。C 又話「不如你地真係試下拍拖？」我嗰陣已經呆左，但係腦海中閃過：其實我同佢拍拖都ok, A 本身人好好，讀書又勁，再加上我的理想伴侶係比較靜，可以聽我講野。講真，A都合符我嘅條件。之後我又唸到我屋阿爸，我阿爸覺得同性戀唔應該存在係呢個世上，而且我亦都唔知道點樣同其他frd 講呢件事，正當我係度思考，A send 左個想殺死C 嘅sticker。我就跟住佢強烈「譴責」C。呢件事就咁告一段落。
事後我越唸越唔妥，好似我做錯野，當初「告白」前嘅想法實現左，我心好亂，於是我就搵C 傾傾。我唔係冇玩過真心話大冒險，亦都試過俾人叫去同人告白，但係都冇咁嘅心情。之後機緣巧合，我得知 B 同 C 呢件事揾A。佢地問A 如果唔洗考慮我的感受，佢會唔會點答，佢話佢都會同我做情侶，話我好人，數學勁，同埋打機勁。呢件事我扮唔知道，但係我亦都再次思考其實我同佢係埋一齊得唔得叻？宜家我同佢唔同班，但偶然亦都會見面傾幾句，每次見到佢我都唔知道點面對好，我想同佢好似以前咁樣，但係宜家對佢嘅感覺奇奇怪怪，我唔知道呢種係咩feel, 有冇人可以同我講下呢個究竟係咩感覺同埋我應該點樣做？我宜家亦都好唔清楚自己嘅性取向，總之我宜家好 lost
多謝睇到呢度嘅人
我第一次投稿，sorry for 1999
麻煩了Admin🙏