#NSS學校
[黃大仙區清水灣道某名校] 啱先喺nss見到一篇投稿，冇記錯應該係 #NSS210928G，唔知點解好似見到曾經嘅自己，講真，睇到嗰篇文嘅時候我真係好緊張，好驚樓主遇到唔好嘅結局。
話說中一嗰陣時，入到精英班，裏面學嘅嘢深過普通班好多倍，我底子唔好，所以會比其他人辛苦更多。我係一個唔太識社交嘅人，全級淨係識到一個朋友，每次grp project我都係剩低嗰一個，其實依家諗返起，記憶已經有少少模糊，但係我好記得中一嘅我過得幾辛苦。
第一次pj，我同我唯一嘅frd嘅frd組埋一齊，但係嗰陣時唔知點解個個都好排斥我，pj要交嘅前一日，佢哋將所有工作推曬俾我，仲講到好似理所當然咁，當然我‘寡不敵眾’，最後差唔多都係我一個人做晒。之後我唔小心唔見咗另一個pj需要嘅工具，佢哋成組人一齊鬧9我，話我freerider，但係其實嗰個工具可以再問老師攞多個，而且唔係急住用，我唔明白點解可以將件事講到咁嚴重。
第二次pj，我又係剩低最後一個。話說我嗰陣時有個好憎我嘅人，但係我完全唔知道點解，我唯一知道嘅係佢同我唯一嘅frd好frd。因為搵組員嗰一日佢冇返學，所以我就焗住同佢一組，但係佢完全唔想同我溝通，我ig dm佢，第二朝我就聽到佢同另一個人講 ‘哇你睇下，我就專登唔理佢！’ 其實我有同佢喺現實中傾過，但係佢每次都係掉頭走咗去，我試過買嘢食俾佢希望同佢和解，但都係冇用。到咗pj要交嘅前幾日，佢突然之間同我講佢一個人做晒，話我係freerider，我當場問號。我承認我衰，我就應該直接自己做晒，做咩係都要等佢呢？
後來班主任俾咗張紙仔我哋，俾我地寫向同佢講嘅嘢，我將我所有嘅怒氣發洩係張紙度，我鬧班主任點解唔好好教佢啲學生，後來佢搵我傾計，佢話我冇同同學好好溝通，我一時語塞，我唔知點解釋我遇過嘅事，就算我點講，老師都覺得係我嘅錯，到最後都係冇解決問題。
直到學期尾，我先至發現原來我嗰班咁憎我係因為我唔覺意開嘅玩笑。希望大家唔好屌我，我嗰陣同同學開玩笑話我真係靚女，然後擺咗個鬼臉，其實我平時都係咁同屋企人開玩笑，我完全冇諗過班同學會誤解我，覺得我好自戀，所以排斥我，冇人同我講過，亦冇人俾機會我解釋。當我知道真相嘅時候，我瞬間覺得我將我一年嘅時間浪費咗喺冇意義嘅嘢上，嗰一年，我成日係度諗我究竟做錯啲乜，我冇喊，但係我都唔開心。
我冇好似原po咁轉校，我留過一次班，因此我識到新朋友，直到今年中五，我搵到我鍾意嘅嘢，我發覺其實唔一定要讀書勁先開心，雖然讀書重要，但係我覺得搵到同確定未來想做嘅嘢會更加開心，我慢慢搵到同好，開始預備大學面試（我想入嘅大學中六學期頭就要報名）。我遇到我鍾意嘅人，我每日慢慢靠近佢，希望多啲了解佢，甚至開始期待下一日會發生啲咩。
俾個建議大家，希望大家唔好因為名校光環而入名校，我向我小學同學了解過，發現名校真係chur好多。當然唔係話所有學校都係咁，但最緊要係適合自己。
小妹文筆唔太好，希望大家都get到我想講咩，好多謝咁多位睇我講咁多嘢，真係好感謝♥️