#NSS學校
[Guest] Admin pls po ig thxxx
對所有欺凌緊、準備欺凌人嘅你地：
呢一刻，你可能會覺得冇乜嘢，好少事，但麻煩你諗清楚，你而家做緊嘅係：對人地會有長遠影響。
用我自己作為一個例子，我係一個比較慢熱、內向嘅人，正因為咁，我就俾同學作為一個欺凌嘅對象。
例如：我中一成績唔錯，自問每次功課都係自己一手一腳做，有好幾次，我小息去廁所，返到課室，我啲功課都俾啲同學自己由我個書包度偷咗出嚟，俾佢地抄。我將件事同老師講，好彩，老師都幫返我。
點解我會講「好彩」？因為我本來以為老師都係講道理嘅人，但唔係。因為功課呢件事，同學就話係我自願借俾人抄，之後又報串，就狂咁針對我，咁我惟有同老師講返個情況，老師又唔理，咁我惟有硬食。我本來以為：算喇，一次半次，由佢喇，點知情況越來越嚴重。
自此之後，班同學就不停咁蝦我，由言語欺凌，到排擠，甚至到肢體欺凌，我真係忍無可忍，我只好同班主任講，點知班主任就不停用「問心無愧」嚟打發我走，仲要大喇叭到同成間學校嘅老師講，我真係好唔開心，我委屈到自己匿埋喺廁所到喊，俾老師見到，就帶咗我去見社工。本來我以為有社工同我傾計，有個傾訴對象，會好啲啦，不過唔係，我俾學校列咗入問題學生。我完全唔知發生咩事，明明我先係受害者，點解冇人會幫我？
睇到呢度，你可能會問：點解你唔同屋企人講？ 我有講，但我同屋企人關係本身一般，加上學校又打電話俾我屋企人講我有問題，變相令屋企人都覺得我唔啱。
我只係想講，你可能會覺得好小事，玩下姐，唔好咁認真，但其實你而家係將你自己嘅一時快樂，添加喺人地以後、一世嘅痛苦身上。我就係因為咁，到而家個心每逢一諗起俾人欺凌嘅事，就不自覺咁流眼淚，完全唔敢同人講野。
欺凌緊、準備欺凌人嘅你地，可能會覺得，係我嘅問題，唔識得睇開啲，但唔該你諗多少少，如果您係俾人欺凌嗰個，你會有咩感受？俾你地欺凌嗰個，受到嘅心理影響係你地永遠都補償唔到㗎！唔該！
講到呢到，希望你地好好咁諗清楚，唔好純粹為咗一時嘅快樂，而影響咗人地一世。
Sor for 1999
Sor for 我唔可以講我係邊間學校，因為我一講咗出嚟，學校就會知道係我