#NSS社會
[沙田某間學校] Re #NSS211009C
你個post講兩性平等，試問你有冇從兩性嘅角度出發去評論？樓下comment都有話囉，女權係指「以女性經歷討論性別平等」，所以廣義嘅女權根本就唔係貶義詞，當然做到over曬嘅另計啦🤷♀️
小妹自問就冇研究過好多，衣著係成日俾人講，着多又鬧，着少又鬧，但係希望你諗吓呢啲嘢唔係單向，你有冇試過鬧個着裙嘅男仔係乸型？可能你冇，不過無論男女點都試過評論啲所謂「標奇立異」嘅衣着。係，我都好唔鍾意着條短裙出街俾人鬧淫，亦唔否認女仔係俾人講得多啲，但係希望若果真係講平權嘅人，就所有歧視嘅目光都唔好有，點解講平權要講到得自己有利，係咪先？
唔講衣著啦，呢個係父權社會，「男性剛女性柔」係刻版印象，個社會已經做咗唔少嘢去改善呢個情況，唔怕話埋你知啦，香港女性就業人口係多過男性架。你估我未試過俾人鬧女權撚咩，有啲男人把口係臭架啦，不過諗深一層，空穴來風嘅事唔會發生，俾人標籤都係做臭咗個朵啫，對住所有人都係咁講，極端女權主義嘅人係發生過唔少，連全球暖化呀、核電廠爆炸都話關男女平等事嘅，呢啲報仇嘅心態咪只會令個爭議無限延續落去，唔會解決問題。男女都有責任去解決呢個問題，首先認清自己爭取嘅係咩，咩先為之平等而冇側重咗喺某一性別上，當然絕對平等係唔可能發生，但係我哋能夠追求嘅範圍當中，點樣先係對兩性甚至性小眾係最公平，而唔係對大家都唔公平。
Re你個利申：其實你係好支持女權，你淨係舉女性嘅例子去講性別唔平等，已經係等於女權，話時話啦，其實女權咪又係性別平等嘅一種，了解多啲先鬧啦，仲話其他人亂鬧。
利申：小妹嘗試用中立於兩性嘅角度評論，嘗試建立「性別不平等並非只針對女性」嘅觀點，唔係幫男人講嘢，希望所有人睇咗可以明白咩先為之平等，而唔係將「女權」呢個標籤無限延伸同仇恨落去。