#NSS個人
[GUEST] 大家好，我最近見到好多post都係有關移民，見有好多數人都有啲同我嘅感受一樣，所以都想講吓我嘅感受+煩惱。講吓背景先，小妹今年15歲，升中四嗰年移民咗去英國。
我自己一直因為好多因素唔想去外國。我比較內向，唔鍾意講嘢，而且只係想同香港嘅朋友一齊，繼續喺一個自己鍾意嘅地方生活。我一直覺得中學係人生其中一個最開心嘅階段，有一班好好嘅朋友，同佢哋好夾，好多話題，我亦喺我F3嘅時候同咗一個男仔拍拖拍咗一年左右。嚟到英國之後見到香港嘅朋友有好多學校活動，去海洋公園迪士尼玩得好開心，見到我就成日都諗：我都好想好似佢哋咁玩得笑得咁開心，之後我個人就好失落。
去英國係屋企人嘅主意，即使我表示咗我唔想過去，佢哋都係堅持要我去。我好明白點解佢哋有一個咁嘅決定，好多人都話去外國好過喺香港讀書，香港好危險，我亦都明白。但係我自己認為，做人最緊要係開心，我唔想去外國嘅話去到固然唔會開心，我要去一個我唔想去嘅地方，我相信我做咩都唔會開心。我嚟到已經三個月左右，喺學校係識到幾個朋友，但係冇話特別frd，可以話係話hi bye frd，或者會有人建議我同佢哋多啲傾計，多啲交流會開心啲，但係我嚟度之後有種感覺，只係想自己一個人，我踏出唔到第一步。返到屋企都只係會閂埋門自己一個，有陣時唔開心會喊吓，有陣時會係咁溫書令自己忙啲，唔好諗啲唔開心嘢。有陣時一到夜晚就會崩潰，但係唔敢喊，因為驚第二日眼腫返學比人見到，所以我平日夜晚會逼自己瞓覺，等到星期六夜晚先閂門發洩喊出嚟。
上面所講嘅嘢都係我嚟三個月嘅日常。喺上面我有講到我有個男朋友，本來我哋一直longd緊，到咗前日佢同我提出咗分手，因為佢唔想longd，我亦明白longd嘅辛苦，所以我答應咗和平分手，即使我仲好愛佢。由嗰日開始我覺得我變得更加嚴重，假日除咗去廁所之外我就冇出過房，飯都冇食，或者一日先食幾塊餅，當然去到星期一至五我就要扮冇事繼續返學。
學業方面，當然係一塌糊塗。上堂要做嘅堂課完全唔知點做，聽唔明miss講咩，佢哋抄筆記又快我又跟唔到，背又背唔入腦，所以test落好低分，覺得自己好失敗，又辜負屋企人對我嘅期望。我諗佢哋想我嚟英國讀書都係想我有好成績入好大學，但係我就咁。
移民、分手、讀書嘅壓力，種種因素都令到我好崩潰好無力。唔嚟都已經嚟咗，我唔知我可以點做先平復到我自己，我唔知可以點形容，但係我真係好唔開心，希望大家可以比啲意見我可以點做，多謝大家睇到嚟到。