#NSS愛情
[港島區其中一間學校 勿相認] 浪費咗大家嘅時間睇呢篇文，好似有啲長，唔好意思。
我係一個正常到冇得再正常嘅高中女仔，由初中開始鍾意咗一個男老師 二十幾歲，係單身嘅。
記得呢個老師未教我之前，呢一科嘅成績係全部科最差、排名最低嘅一科，冇合格過，一次都冇例外。本身都認命，畢竟真係冇天份冇興趣，連打開本書嚟溫，或者自動自覺做練習都冇試過。
直至呢個老師教我嘅呢一年，好記得係上學期初。唔知點解我發現自己鍾意咗佢，本身以為係普通仰慕，後尾發現唔係，係暗戀、一見鍾情嗰種鍾意。為咗等佢記得我，對我有好印象，我好俾心機溫呢一科，有時間就做exercise，每次都做好多，做到成個練習啱曬為止。好幸運嘅，我嘅成績雖然冇顯著增長，但慢慢開始嶄露頭角。原本三十分，慢慢喺第一次考試變合格，變六十幾分、七十幾。雖然未係最犀利嗰堆，但係都開始搵到讀書嘅動力，而呢份動力就係每日見到佢，上佢嘅堂，行過嚟同我講「咦 呢part做得幾好喎」。
準備初中呢一年最尾一次考試，我每一日至少抽三個鐘溫呢一科 見到唔明嘅問題就text問佢。真係好開心，初中呢一年學期終考試前最後一次問佢，佢俾咗一句「加油」我，令到我信心多咗好多，因為，好似咁多年嚟冇人同我講過加油。因為呢一句加油同埋我嘅努力，我抱住一個「佢應該冇機會再教我㗎喇」嘅心態溫書，冇放棄任何一個機會溫書，即係我哋講嘅搏盡無悔。我呢次考試拎咗全級第二高分 九字頭。最令我開心嘅係，佢喺我試卷寫咗一句「excellent」。到派卷嘅一刻之前呢一科我淨係喺小學第一次考試，拎過一次九字頭。所以多謝你。
本來我好努力令自己忘記呢個人，我追返佢教我之前我追過嘅韓星，仲買咗好多專輯小卡，塑造自己一個毒𠹌形象，順便每日俾密密麻麻嘅idol日程塞住，慢慢由時間沖淡一切。
點知到高中，佢又教我同一科，我揀嘅其中一科選修科又咁啱係佢教(當然 我揀呢科選修科係因為想博吓係佢教 點知博中咗）。見到佢再踏入課室嘅時候，我以前忘記佢嘅努力好似白費曬…每次見到佢笑，發現我都會不自覺跟住笑 因為佢真係笑得好靚，佢唔係靚仔唔係高，但喺我心裡面真係好charm。我果斷咁脱曬飯，放棄我追嘅星，放時間心機嚟溫佢教嗰科。仲成日想增加同佢text嘅機會，雖然淨係可以講學校讀書，但係都好開心，例如幫你收完份功課交帶返比你聽邊個冇交、例如問你一啲outc嘢。雖然老師你冇follow都唔會睇到呢個po，我想同你講 我會好俾心機，即使我嘅資質冇可能拎到5**，都最少拎個5返嚟報答自己嘅努力、報答你，比起言語，我更加想用我dse嘅成績嚟多謝你。
當然，師生戀唔受到社會認同，畢竟超越咗道德界線，我梗係有ff過自己同你拍拖，不過都知道係冇可能。有時都好痛恨個社會點解唔接受（好自私添 對唔住）。我可以做嘅，應該淨係得努力讀書，儘量將自己嘅心意有幾密收到幾密。不過我生得又矮又肥又冇自信，就算社會接受 你點揀應該都唔會揀到我喇。
知道應該唔止我一個試過鍾意自己嘅老師，都相信你哋嘅心意唔係兒戲。坦白講鍾意一個人我唔覺得有錯，感情問題一律建議表白 我都贊成，但礙於我自信問題，我就唔會咁做喇。投稿呢篇文都用咗好多勇氣……
老師我真係好鍾意你，不過希望你唔好知道，希望他朝有一日我可以成為老師，入返嚟呢間學校教，見返你。唔得嘅話，希望自己可以儘快忘記你 儘快move on，又或者見到你同其他miss其他學生一齊講嘢唔好再妒忌。
sorry for 1999 辛苦曬admin