#NSS文化
[Guest] 請各位移咗民嘅/喺外地生活咗好耐嘅人好好咁守護住我地嘅母語
我嚟到澳洲就嚟兩年，有唔少朋友都係香港人。有時會約埋佢地去佢地屋企挽。我地喺學校就會尊重翻學校用英文溝通，但私底下/放學後就會用翻廣東話溝通，因為始終廣東話係我地最熟悉嘅語言，溝通嘅時候唔會覺得唔自在。但有次去其中一個香港朋友嘅屋企，佢有一個細佬一個細妹，好似係8歲同11歲。當我用廣東話問佢地野嘅時候，佢地會用英文答翻我。我問佢地平時常唔常講廣東話架，佢地繼續用英文答我話佢地嚟咗澳洲1年，除咗開頭嗰兩星期之外其餘時間一直講英文，就算同屋企人溝通都係。後尾可能佢地見倒我地幾個都係香港人，講咗幾句唔係好正嘅廣東話。我嗰時突然覺得好可惜。其實我會鄧佢地開心，因為佢地嘅英文的確進步神速。但係佢地對廣東話嘅認知同埋聯繫已經幾乎係零。
廣東話係身為香港人應該要識嘅語言同文化。但大家諗下如果佢地新一代喺外國繼續居住、繼續生育下一代、繼續輕視廣東話嘅存在，我地嘅文化只會隨住時間消失。我知道呢段時間香港的確變得烏煙瘴氣，唔再係個適合我地住嘅地方，但係唔代表佢嘅文化都要隨着我地嘅離開而逐漸消失。所以好多謝一直守護住香港嘅人，同時亦希望離開咗香港去其他地方發展嘅人(包括我自己)毋忘初心。係香港呢個地方養大我地，係香港嘅文化令我地成為香港人。就算人不在此，我地都應該為香港嘅文化感到驕傲。🇭🇰