#NSS學校
[Guest] 希望admin可以盡快post ig，長文慎入
我今年F4，讀緊band 1A中學，我今日投稿嘅目的係想表達我嘅意見。係咁嘅，我今日收到通知，由1月開始我哋要返全日。可能你哋會覺得好正常，甚至乎好期待，但我個諗法就完全唔同。咁疫情都持續左一段時間，之前呢一年基本上都係返半日，咁我就習慣咗返半日。不如我講下喺我眼中返半日同返全日嘅分別。
首先半日制嘅好處就係慳時間。其實我間學校半日制同全日制每堂嘅時間只係爭5分鐘，平時如果大家小息之後準時返到班房上堂，每堂就已經多番5分鐘。但就係因為嗰5分鐘，就變咗每日都要遲超過3個鐘放學，返到屋企得返好少時間做功課或者溫書。（半日放13:35，全日放15:40）
第二，我覺得我間學校lunchtime嘅時間太長，有成80分鐘。你諗吓你食飯會唔會食80分鐘啊，根本就好有問題，你可能話出街食係咪要咁耐囉，但係有幾多人會日日都出街食飯啊，搞到我以前每次lunchtime都剩返好多時間，嚟緊1月開始我唯有成部電腦帶返學校喺lunchtime做功課。仲有，學校啲嘢好難食，foodpanda又成日遲到，真係諗起都覺得煩。
最後，我真心唔明點解有啲人咁鍾意返全日，你話如果因為課外活動，咁返半日一樣可以係放學之後參加，同返全日完全冇關係。如果你話鍾意同同學一齊食嘢，咁你哋可以放學後約埋一齊食，返半日都一樣可以。
同埋我之所以咁憎返全日，係因為我以前小學係半日制，我咁耐以來都慣晒返半日，亦都好了解返半日嘅好處。咁不過呢啲嘢，我哋冇得揀，只能夠接受。所以我只能夠喺度向更多人表達我嘅意見。