#NSS個人
[觀塘某Band 1 女校] 麻煩admin po ig。小妹文筆唔好，有咩語文上嘅錯處請屌得細力啲！🙇🏼♀️希望大家可以比少許時間睇篇長文，比啲意見。
是咁的，呢排喺學校比人投訴話我騷擾同網絡欺凌。我都好好奇發生咩事，好奇之際就比人抓咗去見訓導。之後先知原來係同一位同學（下稱A）鬧交搞到比人投訴。
事源其實好小事，純粹係A同學同我同另一位朋友（下稱B）行街，條路好窄，咁啱我又同B傾緊計，A自己喺旁邊睇手機，所以我講咗句：「喂反正你都多餘㗎啦，你咪阻住條路（意思係想講反正我同B傾緊計，A又答唔到爹，所以叫佢行後面，唔好霸住成條路，唔係3個人會企晒成條路，人哋行唔到）。」我同A傾得埋又玩得埋，所以冇諗過A會唔明我講緊笑，再者我哋平時都係咁相處，成日互寸對方。果日我本來已經因為好攰所以心情唔係幾好，A之後仲要不停咁用一種好刻人憎嘅態度話我呢樣果樣，所以一起之下我自己一個走咗返咗屋企。返到屋企先知佢哋不停咁打過電話嚟搵我。但係我都冇理，因為唔想繼續燥底落去。就算B冇點講嘢，淨係喺度食花生，我都冇理佢。因為果陣心情真係差，諗住休息下再contact番佢哋。點知一過就過咗好幾日冇理到。
直到有一日夜晚，我發現A原來退咗個grp（個grp係我同A同另一班人開嘅，已經同B無關），然後有人add返佢入grp，佢就爆曬粗咁猛鬧我翻面唔認人，然後呢樣果樣。我問佢咩事，我做咗咩，佢又唔講。我已經承認自己就咁粒聲唔出係有錯，但係除咗呢樣嘢，我頂多都係語氣可能重咗啲或者講笑講過龍啫，真心唔明仲有咩問題，所以我語氣都好好咁問佢我做咗咩令佢如此不滿。但係佢都係一味話我翻面唔認人同埋話佢多餘唔啱等，我亦再次解釋我只係講緊笑，但係佢直接退咗grp，連解釋嘅機會都唔比我就走咗。我真係好無奈，我都係想解決問題啫，你就咁嘅態度，我都係想維繫段frdship啫。
之後，我喺whatsapp再搵佢對質，傾咗好耐佢都唔化咁，我講咩佢都一律唔聽嘅態度作回應，淨係喺度哦哦哦咁，仲喺度講笑話打錯字冇資格同佢講嘢。我果下真係好火滾，我想同你解決問題你就喺度同我講笑，就話得喇，反正你都好似唔想解決咁，咁冇嘢好講。佢竟然爆一句你知唔知你宜家嘅行為構成騷擾。？？？我成個人呆咗兩秒，心諗你覺得我騷擾你做乜唔第一時間傾之前講。之後亦冇再搵佢，反正佢到講到呢個地步。點知就係咁比人投訴。雖然唔係喺學校發生，但係唔知點解學校依然受理。
返到學校，老師就直接開門見山講：「你同A同學咩事呀，你哋唔係好frd㗎咩？」我就當然全部講晒出嚟啦。其中，我亦因為喺ig鬧佢（冇用粗口）加上放埋少少對話紀錄就比人話網絡霸凌A同學。之後事情就大概得到解決，但係件事傳到校長耳邊，我亦差啲比人記缺點。好啦， 諗住件事完咗，亦告一段落。有時喺ig講下自己唔忿氣就算。
點知呢排，呀媽同我講學校又打俾佢話我喺社交平臺唔應該講咁多嘢，話咩明眼人都知我話緊A同學，跟住叫我唔好再post story（我係post喺密友）。同時亦因為有follow我嘅人dok我背脊，cap我story比A同學同佢呀媽睇，所以叫我收手。我好疑惑究竟點解要cap，同時亦唔知係邊個，所以好煩惱，唔知點做。但係唔講出嚟心又唔舒服，咁想我點啫。最大問題係A同學有心理病，佢呀媽成日縱佢，所以不停打去學校想搞大件事，我就毫無反擊之力。
我已經將所有我認為有可疑嘅人unfol晒，但係都唔排除仲有其他人。所以想問下除咗轉acc仲有冇其他方法表達自己諗咩，感覺A同學同cap圖stalk我嘅人好似去到天涯海角都唔肯停咁。宜家心理上實在好大壓力，好似每日比人監視住咁，做咩都要小心翼翼。考試將近，我真心驚會受影響，我可以點做？我又唔想因為佢del ig同其他社交平臺。
拜託大家幫幫忙。