#NSS愛情
[Guest] 暗戀人辛苦 比人暗戀都好辛苦 知道自己最好嘅朋友鐘意自己更辛苦
我係一個中六學生 讀九龍區某Band 1B中學 成績叫唔錯 一直都好比心機讀書 就快dse都好想可以專注係讀書方面 考完dse先諗其他嘢 但問題就黎啦 最近有樣嘢令到我完全專注唔到讀書 就係我最近知道有人中意咗自己 而嗰個人係我最好嘅朋友。
我係一個女仔 同男仔拍過兩次拖 雖然未係愛到生離死別 但尚算識分得清咩係愛咩係鍾意 而我呢個最好嘅朋友都係一個女仔 正常女仔 唔係tb 但唔多着裙 短髮及肩 佢同我同年 同校 但唔同班 冇拍過拖
我哋由中一就識 大家都好啱傾 就算之後冇再同一班都一直有聯絡 我哋每一日都會傾偈 我一有唔開心就會搵佢喊 我想去邊佢都會陪住我 從來冇嫌棄過我 佢對我好好
前一排啱啱升form6嘅時候 我每一日都好大壓力 每日都好想喊好擔心自己嘅讀書成績 屋企又有啲唔開心嘅事發生咗 我完全唔想留喺屋企
於是一個禮拜有幾日都會去佢屋企到 有時會過夜 我哋會一齊睇戲 一齊落街買餸煮飯 一齊溫書 一齊攤喺度乜都唔做 一齊瞓覺 出街嘅時候佢好自然咁樣拖住我 十指緊扣咁 我亦都好隨意咁樣就俾佢拖住左 我覺得兩個女仔 就算係朋友 拖吓手都冇問題啫
喺佢屋企過夜嘅時候 我會喺佢張床到瞓 但佢張床係單人床 所以我哋會黐到好埋好實 我瞓覺習慣面向牆 佢就讓我瞓喺床入邊 然後佢就會攬住我黎瞓
係我生日嘅時候佢為我準備咗好多比我 帶我去食我鍾意食嘅嘢 陪我去行我想行好耐嘅地方 然後再同我行沙灘吹海風 食個甜品再送我返屋企
直到呢個時候我都好享受同佢相處 覺得我遇到呢一個朋友真係好好 好想可以做一世好朋友。
直至到前兩個禮拜。我同佢出街 無啦啦問我 : 如果你鍾意咗你最好嘅朋友你會點呀？我嗰下呆咗唔識答佢 諗咗陣同佢講 : 我會表白啊 人生得一次 唔做就會後悔 (我都幾後悔講咗呢句)
講完呢句之後 我覺得佢對我好似唔同咗 佢好似對我更加好咗 更照顧我。行街嘅時候 佢會幫我開門 行馬路會企出面 會幫我拎重嘢 我黎m唔舒服嘅時候佢會買藥比我 斟熱水比我飲 我去佢屋企佢會煮嘢食俾我食 又或者佢會落街買野比我食 我喺沙發唔小心瞓着咗佢會攞被俾我 我個嘴污糟咗佢拎紙巾幫我抹
有一日無啦啦食食吓飯 佢呆咗咁樣望住我 我問佢做咩啊？佢話冇呀你好可愛望多眼得唔得？然後佢笑得好開心
去到呢幾日佢都有意無意咁樣喺message又好 面對面都好 都講啲好曖昧嘅說話 例如我好掛住你啊 我想見到你呀 你可唔可以嚟我屋企呀？好想攬住你 如果你係到就好啦 冇咗你瞓唔着
去到呢一刻我先醒覺原來佢係鍾意咗我。
當我醒覺嘅一刻開始 我發現佢所有做嘅嘢我都會聯想到係因為佢鍾意我 我無辦法可以當佢係一個正常嘅朋友 我面對唔到佢。我唔想見佢 我好驚一見到佢會攬住我。我好清楚自己唔係鍾意佢 我只係當佢一個好朋友 而一個先係令我最苦惱嘅點。
當我再諗到我同佢識咗咁耐 佢已經鍾意咗我咁耐嘅時候 我就覺得好辛苦。我知道我唔鍾意佢係冇得迫 但係我覺得好內疚好對唔住佢 佢做咁多嘢嘅時候我完全冇反抗 佢問我如果鍾意咗最好嘅朋友我仲答佢要放膽去追。我覺得自己比緊假希望佢 我覺得自己好差好差好差。
我唔知可以點做。我好想佢一直可以係我身邊 只係用一個朋友嘅方式而唔係戀人。我唔想冇咗佢 佢對我好重要好重要。
我到底可以點做。呢件事已經冇得再拖 佢每一日再透露多啲俾我 好似仲就快要表白。除咗同佢直接講清楚之後冇朋友做之外 有冇第二個更好嘅方法？
To u : 好對唔住我只係當你好朋友而冇愛上你 多謝你對我咁好 如果最後都係做唔翻朋友嘅話 希望你可以搵個第二個比我更好嘅女仔。
Sorry for 1999
好長多謝你睇哂 我好需要意見 求下大家幫下我🙏🏻