#NSS家庭
[GUEST] 我好憎我老豆
我知道佢每日好辛苦好辛苦咁撐起頭家，每日早出晚歸，捱到咁辛苦係為咗畀屋企人一個更好嘅生活，我一直好感恩呢點，多謝你。
但係由細到大我都被佢用言語暴力對待，每一句都係話緊我廢柴、垃圾。我冇溫書就係垃圾、我用電腦畫畫就不停質問我咁做有乜用、哪怕我夜晚臨瞓時睇下書佢都話我扮撚晒嘢。有時我真係會被佢講到好嬲會黑佢面無視佢，如果嗰日佢心情唔好甚至會郁手打我，不停打我後腦，攞衫架打我。
我知道，佢咁講嘢可能係覺得只係講下笑。但係由細到大都被佢咁講真係搞到我好自卑，以我嘅角度睇，佢對我行駛緊暴力，肉體同心理上都係。
佢要點鬧我打我其實我都唔緊要，因為我真係做得唔好，但係一直以來佢對我嘅侮辱令我真係好難受。
呢啲嘢令到我好討厭佢，睇到佢都會覺得厭惡，我好想停止咁諗，但係我就係做唔到，我同時好內疚又繼續好憎我老豆，其實我都想同我老豆關係變好啲……
以上嘅種種原因，其實仲影響到我個人嘅成長，因為佢嘅言語行為，我經不起人哋嘅質疑或者否定，做好多嘢為咗得到他人嘅認同同讚賞，做嘅每一件事冇人讚就會覺得自己做得好差好差，我好想學識自己欣賞自己。
可能你會話唔好理佢咪得囉，但係佢嘅每一句我真係做唔到扮聽唔到，我覺得自己潛意識同意佢講嘅嘢，我默認自己係一個廢柴，唔敢認同自己，唔識欣賞自己，我好驚我要帶住呢個陰影過一世，我究竟可以點……