#NSS愛情
[PLKLSP] 以下分享嘅係一個不可能中最可能的故事，希望畀共同命運嘅Hehe sheshe (theythey😂)們心靈慰藉。
「只要你相信，你最終一定一定會係幸福㗎。」
作為一個hehe，我成日犯賤地暗戀上直男。細個個陣好幼稚，會同時暗戀好多個人，可能因為暗戀多個人更有機會(雖然都係冇可能)，或是因為有人可以鍾意、唔洗諗自己抑鬱嘅嘢好開心，不過遇上「佢」之後就改變了。
中二嘅時候，我鍾意上「佢」。睇住佢唔講嘢、自己一個人發呆傻笑嘅樣，我嘅雙眼完全無辦法望開，因為佢好可愛、佢真係好可愛。我嘗試同佢講嘢、交流，雖然佢好怕醜，但我慢慢同佢混熟，會一齊傾計、打機。我好開心好興奮，仲記得我當時嘅諗法好單純：「只係好想抱緊佢，之後偷偷聞佢嘅香氣。」
試後活動個排，我下定決心，決定要同佢當面表白，就約佢下星期去學校後園，話有嘢講。
佢驚左已經出櫃好耐嘅我唔知做咩，連續一日、兩日唔翻學，最後係約定個日前嘅晚上，佢Message我，命令我講我想講咩。被逼之下，我表左白，佢同我講：「請你搵一個鍾意男仔嘅人。」
但係當時我冇絲毫悲傷，因為都鍾意慣直男，亦因為個種只係「鍾意」，唔係之後兩人之間嘅「互愛」。
我地之後一直係普通朋友，我都冇再鍾意佢，直到中五暑假前後學校翻半晝，我地經常一齊食飯，一齊傾考試同生活嘅嘢。漸漸地，我又犯賤地鍾意佢，但我唔敢表白，因為我都知冇可能。
期間，我屋企人歧視我嘅身份，我個排好唔開心，佢變左我嘅浮木、抗抑鬱藥，每次只要見到佢我就好開心，一分開就抑鬱。我好依賴佢，同時好想為佢做任何嘢，願意放棄所有嘢。唔再只係鍾意佢，而係「愛」佢。但我漸漸搵佢搵得太頻繁，入侵左佢嘅生活，佢就逼我當面同佢傾我嘅問題。
個時我唔敢承認我鍾意翻佢。明明面對面我都要打字講，睇完後佢話：「好多謝你咁欣賞我，但係對唔住。不過我覺得你講出嚟應該舒服啲吧？」我就掙扎左好耐後親口講：「我愛你，X詔崎」
佢只係傻笑，冇任何排斥。
但我發現我放唔低佢，畢竟係人生第一次愛人。最後我以為自己諗通左，打算同佢出嚟最後一次認真傾嘢。我問佢：「朋友嘅關係上，你愛唔愛我？」佢笑住答：「有友愛啊，不過冇名㗎波wwwww」
臨尾我同佢講：「你永遠記住我係呢個世界上最愛你嘅人，因為我願意唔再愛你，好多謝你。」佢最後攬住我，我又喊又笑咁同佢攬左2分鐘。聞左一聞，佢真係好香。
之後我地更加熟絡，我同佢講左N次嘅我愛你佢都冇抗拒。但我都係放唔低💩💩、好依賴佢嚟處理情緒，最後我自己Message提議暫時分開一下。佢反應好大，平時已讀不回嘅佢居然Send到手機介面滿晒，質疑我係咪又亂諗嘢、問我做咩嘢。我只好放棄。
之後我又當面同佢認真傾嘢，我再提議多次分開，但佢最後都係唔想，話傾完明白可以點幫我，會盡全力，希望唔洗分開。而我一直都呃佢呃自己，話自己進步左、開心左，但其實只係唔想佢失望。
去到Halloween個日，孤獨一人嘅我睇住街上嘅情侶、家人開開心心，我好多年嘅抑鬱一夜爆左，決定左要自殺。
好多朋友都知道左，不斷打電話畀我，我唔聽，但睇到佢嘅電話number，我停下腳步猶豫好耐，最後諗住「我唔想再要冇可能嘅希望」拒聽左一次，但第二次嘅時候，我忍唔住了，聽到佢話：「喂。」
咁多年來，佢把聲、佢嘅一切都係一樣咁可愛。
我減弱左自殺嘅決心，同佢講左我係邊，一邊同佢傾計，一邊行上天台。雖然佢已經係搵我搵得最快手個個，但我最後都係見唔到佢，就畀保安捉住、送左去仁濟醫院。
住院期間我好掛住佢，但佢一直線上陪住我(疫情唔畀探病)，叫我好好休息。出院個陣，我明明1個鐘前先知出得院，佢居然飛到過嚟接我。我一見到佢就飛左過去抱住佢，之後一齊食飯、傾計。我同佢講「好好好對唔住，我令你擔心」，佢話癡線有咩好對唔住；我問佢：「你介唔介意我攬你？」佢話唔介意。
我地就攬左第三次、第四次。
去到一個星期前，我抑鬱嘅問題有少少復發，我唔想依賴佢，怕佢受影響。我只好再次同佢提議分開兩個星期。
佢問我：「咁你覺得係咪對你好嘅嘢嚟㗎？」
「長遠係嘅…但我真係唔想…」
「係咁咪做囉，What’s wrong with you~ Good for me, good for you.」
「咁你期望啲咩結果？我有冇咩會令你開心？」
佢望住我話：「你可以唔洗睇醫生咁開心同健康。」
我眼紅到爆咁問：「真係？」
「唔通呢？」
係當下，我確確實實感受到，呢個人愛我、佢真係愛我。
我咁大個仔第一次，第一次畀任何人愛。我之前都唔信佢愛我，但我依家信，我真係信。
到今日我諗起當下，我都好開心好恩惠好感動。
依家雖然佢自己都忍唔住R我講一兩句嘢，但我地基本上一個星期冇一齊玩了。 仲有6日我就可以搵佢食飯、傾計。我有好多好多嘢想同佢講、同佢做，我好掛住佢，有少少頂唔順，但我想堅持，想努力搞好自己嘅情緒，想佢為我開心，唔想佢失望，因為我知道佢愛我，我都好好好愛佢。
我都諗清左，依家嘅我唔係真係咁想同佢做情侶先做得嘅嘢先想同佢一齊，就算係只維持依家會做嘅嘢都已經好夠好夠。其實我係想用伴侶嘅關係捉緊佢，唔想上大學、入社會後同佢分離、疏遠，想兩個人開開心心咁渡過餘生。
我想講嘅係，只要你相信、付出，你原本完全冇可能嘅願望，一定可以有一定嘅成果。不論你係暗戀人嗰個定被暗戀嗰個，你要記住人嘅關係可以有好多可能性，唔好限制自己嘅心靈，人可以用任何方式愛任何人。只要你相信，你最終一定一定會係幸福㗎。
雖然我仲鍾意佢，但，
不論最後我同佢嘅關係發展成點都好，我依家只係知道我愛佢，然後想佢快樂，想同佢餘生都係咁一齊快樂生活，而佢都會係咁諗。
祝 「佢」、讀者
幸福快樂、美滿幸福
(PS 作為讀英國文學嘅，我用嘅前後呼應+對比好似幾Jeng下☺️☺️成功感~
((PS 2 我會等你直至你都有勇氣同我講，你愛我。我愛你。