#NSS家庭
[GUEST] Admin pls post ig 😗
（呢篇有啲長）
家，不是一個地方，而是一種感覺。
幸福，不是金銀滿屋，而是生活充滿愛。
屋企嘅氣氛根本唔似一個溫暖嘅家，而係好冷清，似一場悲劇嘅一個家。
真正嘅幸福——好罕見嘅一樣嘢，要珍惜。
我讀緊初中，先交代下背景。我阿公係millionaire 果類⋯⋯（ sorry 但我唔知點講好，唔好嫌我曬命🙈 ）我細嗰個陣時唔知，去遊樂場玩其他小朋友都會走去問我阿爸阿媽可唔可以同我玩，但係對其他小朋友就唔會，我就覺得好奇怪。細個嗰陣，我話想買乜嘢，阿爸阿媽就會買俾我，所以依家冇乜嘢想買/要，但係明明差唔多咩都有，但係日日都有一種空虛嘅感覺。我都明白無數嘅金錢比唔起無窮無盡嘅幸福快樂。
依家講下我啲屋企人
阿爸阿媽分開咗，所以我唔係同緊阿爸住。佢曾經講過佢想自殺，但係而家冇人同佢住，所以如果佢隨時自殺，冇人阻止佢，我都唔知點算好😭（有意見嘅話pls comment ;-; ) 每次學校啲寫作題目，或者朋友一講「阿爸」呢兩個字，我就會想喊🥲 （sorry 前面果句有啲廢）佢之前都有問過我幾次想唔想一家人一齊食飯，但係我因為溫考試、測驗、默書同埋多功課我哋一家人就冇約到。（阿爸阿媽一齊食飯都會有少少鬧交）如果我阿爸有一日壓力大或某某原因隨時自殺，我真係會好後悔同埋內疚一世。（要讀好書嘅原因繼續睇）
阿媽平時好忙，同埋唔明白人地嘅感受，所以冇同佢傾啲內心嘅感受。但係而家我大個咗，佢都仲係咁嚴。細個嗰陣阿媽要我同細佬極少睇電視、食零食、玩電腦遊戲⋯⋯而家又唔俾我同朋友出街、自己留喺屋企⋯⋯ 佢仲會問我我啲朋友會唔會講粗口、成績好唔好⋯⋯當然，我都係幫我啲朋友，講好佢地個形象😮💨
阿公平時好冷漠，中一嗰陣時中史考試同埋總分居然合格（我嗰次好努力溫書），開開心心咁拎住考卷返屋企。我同阿公講話我中史合格，（即使其他科默書/測驗100分）佢嘅回應係得「嗯」同埋「哦」。我成日覺得我自己唔夠好，一次比一次努力，但係我食嘢嘅時間表亂晒，成日胃痛、低血糖、暈暈地。😵💫 5am 起身食早餐（住得遠）、10am 小息有陣時會食嘢、2pm 食午餐、6pm, 7pm, 8pm 先開始食晚餐。10pm, 11pm, 12am 或者再遲啲先瞓。基本上日日返學都係咁，真係好辛苦。因為阿公阿婆都係鐘意孫仔多啲，所以我淨係可以靠住成績，嘗試做佢哋心目中嘅理想孫女。
期望
阿爸阿媽、阿公阿婆屋企個個一樣對我好高期望，唔單止佢哋，仲有老師、小學老師、親戚、屋企人啲朋友⋯⋯喺學校欠一份功課/欠一次簽手冊/測驗乜做bonus question /測驗睇漏一題⋯⋯喺我身邊嘅人都嘆一口氣，好唔滿意咁望住我。但係我驚達唔到佢地嘅期望，佢地個個就睇唔好我。所以每一次達唔到佢地嘅期望，情緒就越嚟越低落。
心聲
我要身邊嘅每一個老師、朋友、同學、親戚⋯⋯都覺得我嘅生活好完美，唔想佢哋一日廿四小時擔心我。所以我每日返學、去小學探老師、去親戚屋企食飯、出街，踏出屋企門口嘅第一步，臉上都要掛住一個燦爛但係虛假嘅笑容。同人講嘢要做一場戲，講到自己活喺一個無拘無束、無憂無慮嘅生活裏面。要佢哋睇到我快樂、有自信、有成就嘅一面，收埋我傷心、冇自信、有失敗/挫折嘅一面。但係我有陣時忍唔到扮開心扮咁耐，有陣時上上下堂就想喊。每晚瞓覺之前問自己嘅一句都係「演呢場戲，要演到幾耐」。演一套戲有故事嘅開始，有故事嘅結局。但係，呢場戲嘅對白擁有無盡嘅頁數，結局都冇盡頭…
sorry 如果對你唔 make sense，純粹發洩下🤧