#NSS社會
[屯門區中學] Re #NSS220115E
見你講得咁咁多嘢，令小弟我真係忍唔住投下稿回應下你。
–
首先，你一開始講嘅嘢其實一個正常嘅香港人都知道架啦，藍有唔同程度，黃如是。「話民主黨依d傳統泛民要同本土派係同一類人，成件事根本打橫嚟講。」呢句的確係啱，但係有人咁講？先唔講你主題係回應 #NSS220111D，但係又有無必要去重申一啲絕部份人都清楚嘅觀點？
–
另外，你第二點話一啲自稱自己係「黃絲」嘅回去聽政府指揮，去打針，去scan QR Code，我唔知你係咪係咪對政府指揮有啲咩誤解，但係政府每個以防疫為目的嘅政策，唔遵從係伴隨著唔同程度嘅刑罰如罰款。簡單啲講，政府話要戴口罩，咁我唔戴，就會被狗罰我錢，咁我帶，係咪就係你口中「盲目聽政府指揮」？Scan QR Code唔係因為我哋想用，講得呢句你係咪冇堂食過？Scan QR Code只係因為唔想累到間餐廳比人停賽。
–
再者，你第三點講到話啲19年自稱自己黃嘅同學繼續所謂嘅抗爭，換言之我可以理解你覺得呢種形式係無用啦。咁我想問你有咩高見？唔評論追星，我無追開所以亦都無咩好講。你話食黃店係無用，呢種抗爭唔配有民主。你訓醒未啊？2022年啦，呢個情況唔做啲力可觸及嘅事，衝出去政總同佢講我好不滿，定係上街舉旗，做返2019年嘅事？時勢唔同喇，依家做呢啲唔係「抗爭」，只係送頭。你講到咁，想問你又有咩高見？冇嘅話麻煩摺返埋自己。
–
同埋你文章嘅structure真係不敢恭維，講第二點明明一開始話「首先講咗『政治唔關我事』嘅依類人先」，跟住後面果段又話「講返話『政治唔關我事』嘅人」，所以你前面到底係講緊邊個？你知道你打呢篇文出嚟一定會比人鬧，但係你只係自以為知俾人鬧嘅原因，講一大堆同你阿媽係女人一樣無用、全世界都知嘅廢話出嚟，仲有搞到好似眾人皆醉我獨醒咁，事實你所講嘅嘢只係反映你對社會現況嘅無知，自以為世界係會跟住你諗法而改變嘅膠。呢位妹妹，呢個世界無你諗得咁簡單，唔好咩都只係睇表面然後仲搞到自己看破紅塵咁，讀到兩年書，睇嘢睇得深入啲先發表你嘅偉論啦。
–
Sor for 1999，唔認同可以發表下你嘅意見，以上只係小弟我睇完佢投稿嘅少少意見。
完