#NSS學業
[VC] 有冇人同我一樣想Drop通識?
我F.5,考2023年DSE,亦都係最後一屆讀通識嘅學生。
通識對於我嚟講,係一場惡夢。我由升Form 5開始,就一直想Drop通識,不斷幻想降班到Form 4讀公社科,唔駛再對住通識呢科,又或者唔讀通識,2023年DSE都唔應考通識,之後嗰年讀返公社科嘅嘢,考2024年DSE公社科,攞個達標返嚟,再combine cert 申請JUPAS。
雖然我知通識係主科,冇得drop,點都要讀,係理智上知道幾唔鍾意呢科都要捱埋佢,但係情感上都係想drop呢科,係咁唸自己點解唔遲一年出世,好羨慕Form 4嘅學生唔使讀通識呢科根本難到唔係人讀嘅科,好想落返Form 4……
點解咁憎通識? 因為我根本就讀唔掂呢科！首先啲題目根本做唔切,成日炒。例如今次學校考試,卷一兩大題各三個分題,我尾二嗰條六分影響題要兩個影響寫得一個,最後嗰題八分爭議題更加係留空咗,卷二八分嗰題,阿sir話要寫四段,我淨係寫得三段,十二分嗰題阿sir話要三正兩駁,我勉強寫咗兩正一駁就夠鐘要停筆,分數相信會好難睇。可見通識合格簡直要謝天謝地。
其次通識涉獵嘅內容有六大單元,無所不包,廣闊無邊,要學生通通都識,但我肯定更多人同我一樣通通都唔識。上堂講好多概念同議題,但考試點都用唔着。啲人話通識唔使背嘢,但事實係啱啱相反。最基本係成堆概念詞,乜嘢可持續發展,自尊感,生活質素呀都要識定義同各方面,仲有考試要識用。如果要考好啲,仲要背大量嘅時事例子,喺卷二用,卷二先會攞到高啲嘅分數。卷二要攞自己識嘅具體例子嚟論證,但通識內容包羅萬有,要背嘅例子極多,而且背咗一百個例子都唔一定喺考試用得着,好睇運氣。
再者通識係一科要摩打手之餘,仲要係短時間諗勁多point嘅科目,讀到你腦細胞壞死。我自己就係受害人之一,做題目嗰陣(尤其卷二)成日諗唔到point,腦海一片空白,勁沮喪。我仲試過因為咁,Form 4全級小測交白卷零分,拉低哂個平時分。諗唔到嘢都係我通識考試做唔切嘅原因。
(其實通識有一樣嘢仲衰,叫IES。佢就係要你喺F.5就一個社會議題,寫幾千字嘅論文。當中從題目界定到資料搜集呢個議題嘅背景同持分者睇法以及運用通識概念,再到整問卷做問卷調查,邀請人做訪問,最後到分析同論證,都要自己一手包辦,獨力完成,簡直難過登天。除咗帶嚟極大壓力,仲榨乾哂你嘅時間精力,令你冇辦法兼顧其他科嘅嘢。呢樣亦都係我最憎通識嘅嘢。因為佢已經俾教育局取消咗,我呢屆唔駛做,所以擺最後先講。
仲記得教育局話取消IES嗰日,lunch一收到消息,我就興奮到跳起,班房啲同學知道消息,都好開心,同我一齊歡呼。好彩我呢屆唔使再受IES折磨。Thank goodness！)
所以我真係好鬼羨慕班Form 4,可以讀公社科,唔使讀通識。第一,公社科得一份卷(類似通識卷一),冇卷二同IES,主要參考資料作答,唔使憑空諗咁多嘢同係咁作文。第二,公社科有MC,就算長題目唔識,都會有啲分。第三,公社科淨係計你達唔達標,唔係計grade,合格就得,壓力細好多。第四,公社科內容減半,由六大單元減至三大單元,而且範圍較通識清晰同明確,唔似通識咁廣,容易啲吸收。由此可見公社科嘅難度比起通識科係低好多,基本上係冇乜壓力。
我諗讀公社科唯一嘅壓力,應該係有時要寫啲你唔認同嘅嘢(如果你係黃嘅話),如果你係藍(或者冇立場)嘅話,讀呢科直頭冇問題啦。
唔知Form 5嘅同學又有冇同感呢?Form 4讀公社科又讀成點呢?為咗知道大家呢兩科讀成點同對呢科嘅睇法,我整咗份Google Form,希望大家可以填下,不久公佈結果。
Link: https://forms.gle/CUbeZVC6YtrMLpM4A
最後好多謝你哋肯抽時間睇我篇千字文。
PS:雖然我真係好想drop通識讀公社,但都知政府取締通識係為乜,個人都唔支持佢將通識轉公社,只係自己讀唔掂通識啫。同埋都好鍾意上通識堂(最鍾意上Bio,通識第二),因為有好多討論同互動,一啲都唔悶。阿sir都教得好好,個人又nice,有唔識佢都會教我,讀唔掂係我自己衰,唔關佢事。