#NSS家庭
[GUEST] 小妹自細家庭關係就一般般，老竇老母分開住，佢哋冇正式登記結婚，但係佢哋對我都好好，老竇每個星期六日都會可能帶下我出去，一直保持住呢種關係已經有10幾年，老竇老母之間都冇咩拗撬講嘢有講有笑，相處起嚟同一般嘅夫妻冇分別，喺旁人嚟睇係一對關係都唔錯嘅夫妻。
直到上年我老母突然同我講，原來我老竇出邊有咗個女人，仲生咗小朋友已經返緊小學，佢覺得我大個女已經係時候需要知道呢件事，我完全接受唔到。但我老母覺得冇咩所謂，隻眼開隻眼閉，或者可能話佢已經認清咗呢個男人本性就係個浪子。我明白小朋友係無辜，但係我自己都接受唔到佢嘅存在。
佢同我講咗之後咩事都冇變，生活繼續好似之前咁，老竇繼續對我好好，有咩需要嘅物品都會買俾我，又會帶我出去食飯，有時同朋友出街到夜晚都會接我。
會唔會係我嘅問題，其實我係唔係應該諗開啲，去接受呢件事，但係我真係覺得好過份，雖然由細到大我都睇得出我老母對佢已經冇愛，都知道老竇唔係乜嘢好男人，但係呢件事真係好難受。