#NSS社會
[Stmc] 小弟已經唔係學校讀書，已經前往歐美國家讀書。有鑑於見到香港抗疫新聞，有感而發想打篇文，順便訓練下生疏嘅中文邏輯思考。
第一，全民接種疫苗無阻疫情。即使全民打疫苗，香港人都唔會過到正常生活。根據所謂政府專家同高官所講，只要大家接種疫苗，所有嘢都會好似之前咁，大家可以過返正常嘅生活。先唔講2019之後嘅香港會唔會變返正常嘅香港，要思考嘅係100%疫苗接種率又如何？睇新聞會見到嘅係，疫苗好似係神丹妙藥咁，有咗疫苗就唔會中武肺，好似成世都會避免咗中武肺咁。首先我唔否定疫苗有佢相對嘅功效，的確打咗疫苗嘅人中武肺嘅症狀係會減弱，部份人更加連自己中過武肺都唔知。但係以小弟為例，全家打咗疫苗都係同樣中武肺，照樣發燒照樣咳。證明疫苗只不過係某程度幫到人減輕發病時候嘅病情，無辦法阻止被傳染或者傳染其他人。你打咗針都係會中武肺。再者，隨住武肺不斷進化，由Delta去到而家嘅Omicron，由第一針去到而家嘅第三針，基本上你要係咁打針去追趕武肺嘅進化速度，根本無可能有一種疫苗係會令到人唔受感染。總括而言，疫苗不是神丹妙藥，只不過係幫你減輕你嘅病情，亦都無法斬斷傳播鏈。你打疫苗係為咗你自身如果中咗武肺，病得冇咁嚴重而已。而唔打疫苗，並不是社會罪人，並不是沒有肩負起社會嘅責任，並不是社會的異類。打或不打，並不影響公共利益，只是個人權利嘅選擇。
第二，香港清零政策根本無效。清零政策指嘅係零個案，無論係境內或者係輸入個案，依個都係無可能。香港的確係清零咗一段時間，但係就算政策有幾「嚴謹」或者叫做嚴苛，都無辦法阻止到病毒來港。先唔講人口來港帶來疫情，就算通過物件同埋空氣，武肺照樣會傳播。正所謂天下無不透風嘅牆，清零係冇可能長時間維持到。同時，有人會指出，香港之所以一直無法清零，係因為有人不守防疫措施，導致出現疫情缺口。首先，依樣野係冇辦法避免，就算台灣國內冇感染，之前成為媒體紛紛報道嘅疫情淨土，而家都係忙於處理疫情。證明係無方法令到香港零個案。再者，基本上全球多個國家都係主張與病毒共存，例如英國放寬唔同嘅防疫措施，美國入境唔需要隔離。反而唯一主張清零政策嘅只有香港同中國，但就算係中國，佢地嘅封區同埋強制檢測都冇辦法做到清零依個烏托邦。即使香港同埋中國可以清零，但係其他國家仍然主張與病毒共存，當其他人因為與病毒共存，可以如常生活。香港係咪仍然要繼續封關鎖國，唔比他國人民進入香港，香港人出國回港需要隔離，咁先係真正實現經濟攬炒。
第三，武肺只不過係風土病，香港人需要接受嘅係武肺嘅存在。武肺只不過係一種高傳染性嘅病毒，同感冒無異，對大部份人係無生命嘅影響，只係會病數日。同樣有人會話，長者一但感染武肺，死亡機率非常高。但係長者本身大部份有長期病患，就算係好普通嘅感冒，細菌感染同埋跌親，佢哋死亡嘅機率都好高。反而當你中過武肺，你身體自然會有保護機制，對抗武肺，再中嘅機率或者病徵會減輕好多，依個亦都係一直講緊嘅群體免疫。香港人因為政府不斷誇大武肺嘅嚴重性，將武肺看作世紀大敵，先會令到香港人誠惶誠恐。
從而引伸到一個反思嘅問題，究竟因為所謂清零政策，捨棄自己嘅個人權利值唔值得。香港人捨棄堂食，互相指摘他人不守防疫規則，嘲笑外國疫情上百萬，轉而支持安心出行，因為支持政府心目中嘅理想清零國度而去閹割自己個人嘅權益。究竟依樣野值唔值得，相信依個問題香港人心中有數。
小弟打依篇文章只係有感而發，我並非專家，亦極度討厭phy chem bio，並無任何有建設性嘅建議，只係希望大家思考多d社會現況，多角度思考唔同嘅社會問題。