#NSS社會
[GUEST]
re #NSS220124E
長文慎入！小妹第一次投稿 打嗰陣嬲到手震 所以可能有啲打錯 希望各位體諒
睇到篇嘢嗰陣真係火都黎埋，所謂嘅價值其實由頭到尾都係人類賦予俾動物，動物有冇價值並唔係由我地決定。再講，動物係人類嘅財產？佢地對於人類有價值就可以留低，而冇價值就要死？對於每一個人黎講，動物嘅價值都唔同，憑咩你要決定所有動物嘅價值？就算係人都好 每一個人都係無價，係冇可能用數字去定義每一個人嘅存在，而動物都係一樣。
另外，如果生物嘅存在就係為左傳宗接代咁我地唔需要再關心其他野 什麼社會議題 世界危機 全部都唔需要理 每個人只係需要生仔同生仔就夠 如果唔係咁嘅話 點解某啲生物傳宗接代嘅能力低就唔應該留低？
仲有，執著殺生同唔再食肉或者見到動物攻擊自己而唔反抗有咩關係？本人係素食者而我唔食肉唔係因為我執著唔應該殺生，而係人類處理動物嘅時候總係覺得自己高人一等 而從來冇尊重過動物 不過呢啲係另外一樣野 係呢到唔詳細講 至於見到動物攻擊自己就一定要殺死動物？既然人類被稱為全世界最聰明嘅物種咁應該有其他解決方法啫 多思考多分析之後其實我睇唔到殺死倉鼠同野豬係利大於弊
再者，我得登去search同理心嘅意思（同理心亦稱為共情或換位思考，是理性與感性交織的能力，是主動地去瞭解對方實際情況再去感受，能夠察覺對方真正的情緒和處境，並用對方實際的狀態去思考和感受並不隨意插手他人課題。）而你所謂支持再生同寬恕犯人係因為佢地之後會為我地帶黎價值。咁樣唔係察覺對方嘅情緒同處境，純粹係因為對方某程度上可以帶黎價值所以先支持佢地。睇到嗰句「佢地無能力帶來更多價值，同理心自然唔適用」，真係好想講，同理心係換位思考，係進入對方嘅處境然後理解佢地，與價值冇關，所以你支持再生犯人根本就證明唔到你有同理心，更加突顯你嘅冷血果斷。
至於「人類唔可以傷害任何動物黎得益」嘅講法的確係商人利用大眾情緒去賺錢嘅說法，但係同時亦都唔錯得晒，就算唔傷害動物，我地都唔應該利用動物去為我地帶黎利益，因為動物從來都唔係一件商品，一件物件。當一個人被販賣嘅時候我地會覺得不公、憤怒，但係當一隻動物被人當商品交易嘅時候，我地好多時都無動於衷，而呢個係無可否認嘅事實。
同埋你叫人放棄仇恨但係又叫人繼續屌正苦？不過都唔重要，最重要係點解呢個話題係小事？的確，相比疫情、難民、全球暖化呢啲問題，呢件係一件小事，但係呢件事正正反映人類對於動物嘅態度，而呢樣根本唔係唔值得關注嘅野。動物議題從來都冇人停止討論過，由安樂死到基因改造，呢啲大大小小關於動物嘅野全部都好值得我地關注。係嘅，呢個社會有好多議題，但係其實每一個議題對於社會都有唔同意義，冇話邊啲值得關注，邊啲唔值得。真心，咁多條動物嘅命分分鐘比人類延續更加重要。如果人類嘅下一代得唔到正確嘅教育，咁延續落去都冇意思。
最後，人道處理諷刺係因為根本成件事就係唔人道。安樂死唔係唔人道，唔人道嘅係安樂死嘅原因。安樂死嘅原意係幫動物或者人類脫離痛苦，但係宜家嘅安樂死係幫佢地脫離痛苦咩？唔係。所以根本成件事都唔人道。
內容可能有啲偏激，抱歉🙇🏻♀️