#NSS個人
[Guest] 大家好，小妹08，今年中二，呢排有煩惱，又唔知同邊個講好
咁呢我幾鍾意睇台灣啲youtuber, 睇吓睇吓，推薦片出咗《全明星運動會》嘅片，佢係台灣一個運動實境節目，兩隊藝人好認真比賽唔同運動項目，我由第一季睇到而家第三季，越嚟越想去體驗嗰種熱血
你可能會話，想玩咪去囉，而家有疫情唔得，咪遲啲去囉，我都想，不過有啲原因令呢樣嘢未必實現到
1）我冇運動細胞，阿媽因此唔俾我去玩運動
我PE真係年年C/D，雖然鍾意運動，但係啲比較擅長運動嘅同學都嫌我太廢，唔肯教我，班入面有幾個同我一樣冇運動細胞嘅同學，但係佢哋都唔鍾意運動，唔肯陪我練/玩
入校隊就可以有人教，亦有器材，不過入隊要家長簽名，我問咗阿媽幾十次，亦花咗好多時間嘗試説服佢，不過佢都係唔俾，阿爸一樣。入隊要選拔，冇人同我練，呢樣可能可以靠自己練基本功嘅，不過冇家長簽名一樣冇用
2）學業/前途問題
我讀band 1學校，成績都中上嘅，去玩運動，係會有時間溫書嘅，不過我個人好難一心二用，一段時間只可以focus喺一樣嘢，而其他嘢做出嚟質素會好唔掂，我今年好唔容易搵到適合我自己嘅讀書方法，實在唔想白費自己嘅努力，而且我已經有心水嘅高中electives, 大學major, 甚至係職業，做到我呢個心水職業先係我嘅最終目標，如果成績唔好，就達唔到呢個目標，到時仲講運動？
其實唔係冇方法，等考完DSE我都18歲，唔使家長簽名，我就可以自己去報興趣班，就會識到志同道合嘅frd一齊玩，屋企雖然比較嚴，平時唔會比我同同學出街，不過到時18歲，只要唔太夜，講句就得啦
不過，我都係唔想等咁耐，我已經體會過機會唔等人呢樣嘢，始終青春有限，早啲體驗到嗰份樂趣，嗰種熱血會好啲
話時話，講咗咁耐，我都冇講過自己鍾意咩運動，其實幾多吓，有啲係已經鍾意咗幾年，有排球同乒乓波；有啲係PE堂玩過覺得好玩，有閃避球；有啲係睇動漫/卡通片從而引起興趣，有棒球；其餘就係睇《全明星運動會》而認識同產生興趣，有健球，應該就係咁多，咁當然我唔會玩晒咁多樣，到時真係有得玩嘅時候會揀定一樣玩，不過到時先算啦
我其實冇同人講過我有咁多玩運動嘅打算，我身邊冇乜熟人對運動有興趣，唯有喺度講。我知道自己真係會有恆心去玩運動，唔會半途而廢，我唔係想做運動員或者攞啲咩成績，只係想有個興趣，體驗下人哋口中咁有魅力嘅熱血係點，希望大家可以俾到啲意見我
篇文咁長，多謝大家睇晒
admin希望你揀中我
thank you