#NSS家庭
[Guest]
我覺得自己嘅出現俾咗好多壓力我父母。
講返少少背景先，小妹讀咗直資學校11年，身邊最親近嘅同學仔父母都係打政府工，所以學費只需要俾一半，但我爸媽唔係。
我爸係做IT嘅，佢部門嚟講應該係under啊頭，人工幾多我真係唔知。佢緊呢幾年成日都講話部門老細唔做嘢，將所有job推晒俾自己，但係出面啲細嘅都知係自己做。老細乜都唔洗做，但係人工佢又袋晒。 雖然唔憤氣但係打工仔嘅世界就係咁㗎啦⋯⋯媽媽本身係幫緊自己家族生意打工，但疫情開始咗之後，生意就一落千丈，上個月老細決定退休，媽媽依家係「退休」狀態。我記得我媽以前曾經講過：「你以為我個個月月入萬幾啊？」由嗰陣開始我已經知道我媽媽人工唔高。
由細到大我都唔祈求咩奢侈品，我亦都好知足。媽媽本身性格好大方，做咩都好為人著想，所以佢人緣好好。不過有時我覺得你越係大方，你就越蝕底，可惜我講一次，我就比佢鬧一次。呢個都唔係重點，重點係我每個月嘅學費係講緊九千幾，一年約十萬。未計衣食住行同補習嘅費用。我知道我成績唔算好，但我唔想浪費佢地咁多錢去補習。IB補習講緊一堂七百幾蚊，我真係唔想補。不過我知道如果我唔補，我成績就唔會好，到時公開試考得差冇大學收，我一定會後悔。
我好想減輕佢地嘅負擔，但係我又唔知可以做咩。
我應承你，我嚟緊呢一年會俾盡200%嘅努力！
我會用最後一年嚟報答返咁多年你地對我嘅供書教學。
第一次投稿，文筆唔好真係唔好意思🙏🏻
Sorry for 1999