#NSS個人
[[GUEST]] 呢一句「如果你係女仔就好」已經成為咗小弟最大嘅噩夢。
(長文同負能量慎入！)
介紹返背景先，我今年F6，係獨生子。一直以嚟屋企兩老都特別想生女，但由於媽子身體差同家境貧窮嘅關係，所以呢個念頭就打消咗。
可能佢哋想要個女嘅怨念(?)或者欲望太大，搞到由細到大佢哋同我講過最多次嘅說話就係「如果你係女仔就好。」雖然我聽耐咗，已經習以為常，但多多少少都會覺得心有啲唔舒服。
我兩年前就開始暗戀緊我嘅一個好兄弟。我覺得嗰種感覺好辛苦，因為身邊冇一個人支持同性戀，加上佢講過佢只鐘意女仔。我明知我同佢冇可能但都係好鐘意佢，放唔低。我嗰時開始同意父母講嘅嗰句「如果你係女仔就好」，並怨恨點解我會係男仔。我亦都冇勇氣同屋企人佢哋出櫃，我好驚佢哋講嗰句嘅次數由兩日一至兩次變成日日一次。
隨住時間推移，鐘意但唔會有好結果嘅痛苦同兩老日講夜講嘅嗰句，可以話係帶比我精神上一個比較大嘅折磨，我冇哂動力去做上DSE呢個戰場嘅準備(對唔住,還請各位原諒我抗壓能力弱)。我有同老豆媽子講過唔好再喺我面前話如果我係女仔就好，第二日佢哋直接冇咗件事，繼續講。
到最後，我真係頂唔順暗戀對方但唔會修成正果嘅折磨，所以我決定同嗰個兄弟表白，希望可以透過佢嘅拒絕嚟擺脫折磨。我寧願痛得一時，唔會痛得太耐。
但問題嚟了，表白嗰日，如我所願，佢拒絕咗我。但我忘記唔到佢之後喊住同我講嘅最後嗰句一一「如果你係女仔就好」。嗰一日起，我會經常性發夢夢見我身邊所有人都質問、鬧我點解我唔係女仔、不斷講如果我係女仔就好。
我而家就嚟要癲，明知冇好結果仲點解要去表白，點解自己唔係女仔。一諗起又要聽媽子佢哋喺度話我係女仔就好，我就想喊。呢一句對於我嚟講，真心仲難聽過粗口……
多謝你哋睇到呢度！我打呢篇文點主要目的係想發洩情緒，如果有影響到你哋嘅心情，喺呢度誠懇同你哋道歉。
Sorry for 1999，第一次投稿。
麻煩哂Admin。