#NSS家庭
[GUEST] Hello 我係#NSS211113E嘅樓主
(長文慎入)好耐冇投稿lu ʕ •ᴥ•ʔ
係囉你見到呢個post即係我又有問題
Ummmm點講好呢
呢排政府咪宣布一堆垃圾要求同法例嘅，然後我媽咪係信到十足嗰種。佢淨係比我落樓下商場買野，令我覺得好冇自由好辛苦…
但更加令我唔開心嘅係父母之間嘅關係差咗好多。之前咪講過我細個嗰陣老豆爛賭差人一身債，最後佢哋信主慢慢還返錢再復合結返婚。而家可能因為疫情媽咪冇返工成日留起屋企同埋返少咗好多教會，佢比以前多咗好多負能量….小小嘢已經可以嘈一大餐：唔記得揼垃圾、唔記得收衫……咁我都比之前做多咗家務希望唔好激嬲佢。但係前晚媽咪好大火氣，佢喺度講返以前嘅事罵老豆(老豆長期訓疏化然後佢喺度訓下聽下又比啊媽嘈醒下咁)，咁我就冇出聲留喺自己間房到做數，但出面呢個狀況持續咗兩個鐘有多。去到凌晨兩點老豆忍唔住大嗌「你唔好嘈啦！我而家就落去行街散心！最多我咪聽日請假唔返工！」之後佢哋互罵咗一陣終於靜咗訓覺。
我突然間覺得所有野都冇變過：佢哋仲係咁唔開心，我仲係乜都做唔到。十七歲嘅我同七歲嘅我都係咁冇用。我真係好唔開心好唔開心，但我連喊都唔敢比屋企人知，我偷偷地係被竇入面喊、唔敢大力喘氣。我唔敢比佢哋知我嘅感受。
我覺得好後悔係細個佢哋嘈嗰陣點解要大嗌「你哋淨係理自己！都冇諗過我感受！」。如果佢哋當初真係冇埋我感受，返教會之後繼續保持離婚，而唔係為咗我結婚。咁或者對大家都好，唔好搞到而家大家好似得返責任同唔甘心咁…..
我開心咗十年，我好驚而家所有野又變返以前咁，好驚又要面對嗰個好靜好靜，得我同媽咪嘅屋企。我好想離開呢個屋企，好想好想返學，至少喺學校入面會令我覺得自己同其他人係一樣，唔使煩惱屋企事。
我而家都唔知我想點，我好亂但我又好唔開心。我唔知可以同邊個講唯有喺度投稿。
最後我想講原生家庭對一個人嘅影響可以好大好大，求下大家唔好忽視身邊人嘅求助，以為只係屋企人之間嘈兩句，嘈兩句係唔會去到咒對方去死嘅程度….同埋多謝之前比comment開解我嘅陌生人，有時淨係一個❤️已經幫到我好多(｡ ́︿ ̀｡)