#NSS家庭
[GUEST] (長文慎入)Hello又係我喇
我係#NSS211113E嘅樓主
估唔到上個post都未出又黎投稿呢
係囉我父母又嘈交了，佢哋已經嘈咗幾日，我真係未試過每日都會喊，我甚至覺得呢幾日內喊嘅次數比以前一個月內喊嘅次數要多好多好多。今晚媽咪同我一齊睇緊電視，然後佢開始講返以前嘅事。「你睇下你有XX咁耐，你啊嫲有冇黎照顧過你、關心過你！你睇吓人哋係仔就佢就去錫去照顧，就係因為你係囡！我同你講你以後唔使認佢做啊嫲，唔使叫佢！你話係我同你講嘅…….」（XX係某種病，好普遍唔少女性都會有，我驚比朋友發現係我所以唔詳細講。而家呢個病對我日常生活來講已經冇乜影響，食藥就可以控制到。）
然後爸爸喺廳聽到又好唔開心，佢哋又嘈咗陣。然後今次爸爸真係落咗樓下，媽咪下一秒即刻去咗鎖大門。我自己一個係間房到諗睇黎今次真係完，所有野都唔可以好似以前咁，原來件事係唔會好轉。之後我反鎖自己喺房開大電視聲，第一次打電話同朋友喊。我真係好唔鍾意煩到其他人但我已經冇其他選擇，原來我已經唔可以再呃自己一切正常，我已經係去到要打電話嘅地步。之後朋友聽咗我喊一陣間之後幫我冷靜分析下件事，「其實你爸爸落去冷靜下都好，起碼可以避免更難坎嘅場面，不如你問下你爸爸今晚有冇地方瞓先？」。
之後我冷靜左下wts爸爸，佢叫我打俾婆婆佢去婆婆度瞓。我照做之後媽咪又罵我，我真係唔知應該點做。「你由得佢走啦，我哋兩個靜靜地冇人嘈唔好咩？」我唔知點答於是我靜咗，我好唔鍾意得兩個人好靜得電視聲嘅屋企，但我都好唔鍾意三個人嘈黎嘈去嘅屋企。公公婆婆打電話過嚟安慰我話唔驚唔使驚，驚就過去佢哋屋企住果下無啦啦我又眼濕濕。我都十七歲佢哋仲當我七歲咁。
夜晚臨瞓前媽咪又開始講返以前嘅事（求下大家唔好罵我媽咪，因為我知佢真係因為爸爸受過唔少苦，我七、八歲之前都係靠政府綜緩同埋媽咪自己打工去養大我，佢仲要孭住老豆嗰堆債捱到身體有病以後都冇機會再有BB）我小學嗰陣已經知道我未來只會得呢兩個親人。
佢哋兩個都叫我早啲瞓教休息，但屋企得咁大。佢哋兩個講嘅野我聽得一清二楚，我一路聽一路就覺得好唔開心。原來我一直以為嘅好轉都係我嘅一廂情願，所有野都冇變過。跟住我又開始喊，之後又過嚟投稿。呢幾日我都冇寫日記，因為我唔想將來記返嘅只係唔開心嘅回憶。
其實我自問自己情緒move on得好快(唔開心嘅感覺都黎得好快)，我mbti係屬於e型㗎(●°u°●)打完呢篇文之後我已經唔係好記得最初喊嘅原因。好耐冇試過一日內喊三次以上有啲攰，而家都凌晨四點了。或者聽朝起身佢哋會和好相處返、又或者好似以前離婚嗰個狀態咁。我開始接受現實就係咁，我嘅屋企就係同其他人嘅唔一樣。我好似仲有好多野想講，但唔係好記得係乜就算～
到最後想喺度多謝返我嗰位朋友，不過佢好似冇follow呢個page哈哈。希望我之後唔會亦都唔使再投稿(⁎⁍̴̛ᴗ⁍̴̛⁎)
我平時都係個好開朗好鍾意笑嘅人黎㗎，不過係唔開心嗰陣唔知點做好咁解Σ(-᷅_-᷄๑) 雖然應該冇乜人會睇呢篇又長又不討好仲咁多負能量嘅文，不過如果你睇到呢度嘅話——多謝你。