#NSS個人
[Guest] 究竟生存有咩意義？
由係阿媽出世個陣，我就無得選擇我想唔想留係呢個世界上，細細個，阿媽叫我做咩咁我就要做咩，阿媽叫我聽老師話，我聽，阿媽叫我唔好揀飲擇食，我聽，阿媽叫我唔可以做咩，我就唔做咩。
以前無自我思考嘅能力，就會覺得聽人話就係乖，我聽老師，阿媽話，佢哋就唔會鬧我，仲會讚我，我會覺得開心，但係慢慢開始就會發現，自己就好似個公仔咁，人地叫我做咩我就做咩，唔比我做我就唔做，我生存嘅意義又係咩呢？
我而家中四，我由上到中學開始，有可能係叛逆期嘅影響，我開始欠交功課，唔溫書，從一個成績唔錯嘅學生變成一個成績差，無責任感嘅人。我無在聽佢哋講要做功課要溫書，但係我亦都唔係做緊一啲自己想做嘅嘢。
好多人會話自己有啲咩夢想，有咩目的，但係我諗嚟諗去，都無一啲自己想做嘅嘢，其他人眼中我可能係一個好鍾意打機好懶嘅人，我承認我係一個好懶嘅人，但係打機對於我嚟講只係一件唔討厭嘅嘢，係一件令我無咁無聊嘅事情，並唔係想做，只不過係對比於溫書做功課來講無咁討厭嘅事情，如果我呢一世人最唔討厭做嘅一件事，或者係了結自己嘅生命掛。
可能你會好奇，如果唔討厭，點解我到而家都仲喺度，我係一個好細膽好驚痛嘅人，平時望落去好似好開朗活潑，其實我只係將一啲唔開心嘅嘢收埋，收到真係得返自己一個嘅時候先會攞出嚟，我好驚同其他人表露自己唔開心嘅一面，淨係會同人講開心嘅嘢，由細個到而家都係咁，其實屈住屈住都幾難受，但係我唔夠膽同人講，我驚人地對我嘅意見，都驚喺某啲事情做唔好之後會令人失望，而搞到自己好緊張，好攰，點解我會生活得咁辛苦，我生存係呢個世界上有咩意義，明明無問過我就令我出世，明明有啲嘢唔想做亦都可以唔做，點解要比我做，明明我根本就唔想係呢個世界上出現，明明我有好多機會可以結束呢段生命，但係都因為我嘅懦弱而失敗，我真係好憎我自己，好憎生存喺呢個世界上嘅自己。
（Sor for 1999）