#NSS家庭
[GUEST] 「其實我比任何人都關心你 只不過用錯方法 對唔住」
先講少少背景，我今年中五，媽咪係家庭主婦，大約年半前佢因為手痛，睇左醫生，發現原來因為條頸嘅軟組織大部分都走哂出來，而且掂到神經線，仲係中樞神經，所以影響到佢兩個手踭痛，手指從不間斷麻痺，好痛好困擾，呢個病冇藥可以醫，唯一方法係做手術，但風險好高，所以都唔打算做手術，寧願痛症跟一世，平日佢晾衫摺衫煮飯，甚至掹插蘇、揭廁板都好痛。
因為呢樣野，冇一日係訓得好，佢形容每朝「擘大眼就係惡夢嘅開始」。
有一日下晝我都得閒，佢話落街買餸，我想同佢一齊落去幫佢攞啲，唔想佢攞咁重。
我：「你多唔多野買呀？」
媽：「都冇咩呀，你沖涼先啦。」
我：「有咩你可以叫爸爸放工買呀，佢日日放工返到樓下都會打返黎屋企問有冇嘢買，而你每次就話冇。」
我見佢話冇咩買，先信佢唔會攞太重嘅野返黎，比佢自己落樓下買。
佢買完返黎屋企，結果就買左好多野：一斤菜心、半斤豆苗、排骨、一包比目魚、麵包、一包鹽、三盒濃湯寶。可能對於一個普通嘅家庭主婦來講，攞呢啲野只係正常嘅份量，唔太重，但對於我媽咪雙手來講簡直係好大負擔。
我即刻變得好嬲，我心痛佢手痛嗌哂救命都要自己買咁多野，又怪佢唔洗我幫手攞，跟著忍唔住喊住咁話左佢，而且語氣的確有啲重。
我：「你今晚需要用咁多野咩？我都叫左你比我落埋去一齊攞㗎啦，我又唔係唔得閒！」
媽：「唉 咁有時見到咩突然醒起要補給就會買㗎啦，越買越多都冇辦法㗎。」
我：「你次次都用呢句做皇牌，等我收聲唔話你！你買左架車仔又唔用，係都要抽哂上手！」
媽：「咁而家唔買都買左啦，我最多今晚買左餸，唔煮囉，即刻休息下隻手」
跟著我都收左口，但繼續喊多左一陣，我真係又嬲又心痛。
我入左房做功課，佢無啦啦入黎。
媽：「我都話我今晚唔煮囉，你唔好再黑我面。」
我：「我冇可能一下子就唔嬲㗎！」
媽：「咁我都有行動去回應你呀！仲有我點會唔明你嬲乜嘢啊，嫲嫲有時都買咁多嘢我都係咁話佢啦。」
我：「咁你明仲要咁樣做！」
媽：「咁而家都買左啦，我今晚咪唔煮囉！」
之後大家越講越激動，最後演變成衝突，而且我未嬲完，再唔係語氣重，而係變左真鬧，我知咁樣好唔尊重佢，但我真係太嬲佢明知痛都要加重自己負擔。佢仲話佢受軟唔受硬，如果我好聲好氣啲，唔好咁惡，佢先會覺得我啲眼淚流得有價值，依家咁樣佢話根本感覺唔到我係緊張佢，弄巧成拙。
爸爸放工返到嚟，見到我哋咁嘈，就鬧埋我一份，話我用錯方法，我應該唔好理佢買野，因為之前佢都試過話媽咪攞重嘢，最後一定會鬧交收場。
最後，佢仲話要再落去買多啲野，特登激返我……
明明我係關心媽咪，最後演變成鬧佢，其實我都有啲內疚又好委屈。但我唔想佢再攞重嘢，我唔知應該點做，究竟我應唔應該再話佢，由得佢咁，定係我應該自己轉換心態，放開呢樣野呢？
真係好無助，希望各位比下建議😭