#NSS愛情
[某觀塘區中學] 我同佢識咗四年，我自己係bi，而佢講過自己唔鍾意女仔，亦都唔多支持同性戀。但係佢對我真係好好，好到有一刻令到我覺得我同佢係有可能。
佢會同我十指緊扣，攬我，摸我個頭，挨住我，會呷我醋，會叫我bb。呢一切嘅嘢佢都只係出於朋友嘅身份去做，但係我真係好心動。
有一次我哋隔住口罩就嚟kiss到對方，嗰一刻我個腦好似hang咗機咁，一片空白。嗰晚我返到屋企之後諗咗好耐，其實我係咪應該退一步，開始遠離佢，先可以令到自己唔鍾意佢，但係我又好唔捨得，唔想我嘅生活冇咗佢。
我聽住佢親口講鍾意邊個男仔嗰刻，只能夠笑住咁話快啲追佢啦，其實我個心真係好痛，但係我只可以扮冇嘢，嗰陣我心諗好彩有口罩遮住我嗰個夾硬擠出嚟仲要假到爆嘅笑。
其實我諗過好多次放棄鍾意佢，但係邊有咁易話唔鍾意就唔鍾意⋯所以想問下大家如果你有一個好鍾意嘅人，但係你知道冇可能同佢喺埋一齊，咁你會唔會選擇去遠離佢？定係就算個心會成日噏住，會因為佢成日唔開心都好，都選擇繼續留喺佢身邊？