#NSS愛情
[GUEST] 介紹返少少背景先,小妹而家F6,正值DSE最後衝刺嘅時候。而我男朋友留過一年,而家F5。
我同佢一齊咗三年,係互相嘅初戀。雖說係第一次拍拖,但呢三年嚟我哋都冇點嗌過交,甚至可以話而家仲同啱啱開始拍嗰陣差唔多。而個問題係近幾個月先出現。
臨近DSE,我哋呢屆嘅考生連學都返唔到,甩咗嘅課程要自己補返..相信好多考生到處於水深火熱之中。個問題就嚟啦,而家我每日都要花好多時間溫書,唔係咁陪到佢。之前呢啲空餘時間,我哋可能會一齊打下機,煲下劇咁。但而家我要溫書,真係唔太可以陪佢做呢啲嘢。咁佢就開始頹,我都唔知可唔可以咁講,總之就係每日上完網課就瞓,我溫緊書嗰陣佢訓,諗住食飯或者臨瞓前可以休息一陣,佢都仲係瞓緊..其實我都好想我男朋友可以同我一齊溫書一齊進步。但就因為佢F5,我F6,所以我要考dse嗰陣佢唔使,我要溫書嗰陣佢唔使。有試過因為壓力太大而喊,同佢講佢都好似唔明咁..唔係話瞓覺有咩問題始終佢都未考住,我唔可以逼佢同我一齊溫。只係當自己男朋友同自己唔係同一個步伐,甚至唔明我嘅時候,我就覺得好無助,或者覺得好攰。壓力大嘅時候都唔知可以同邊個傾訴(身邊朋友個個都努力緊,唔想騷擾佢哋)
多謝你哋睇到呢度,如果有經驗嘅人可唔可以畀啲建議我？或者話點樣先可以有嗰種同男朋友一齊努力一齊進步緊嘅感覺..因為諗返起好似次次同佢一齊都係玩緊,做正經嘢嘅時候佢都唔明我咁..