#NSS家庭
[guest] 各位好 今日我係純粹發洩（我係以前po過嘅19年投資移民英國year 10 學生💛)
好啦咁今次係家庭同埋個人問題，唔再講留學住：
講講吓背景先，我依家住緊喺一間house, 4房1廳。目前屋底下住嘅有我，阿爸阿媽，我妹妹，同埋weekends + holidays 會返嚟嘅表姐（year 11)
咁房間嘅分配就係咁啦，阿爸阿媽一間房，阿妹一間房，我自己一間房，同埋我表姐一間房。（我哋全部房都係雙人床，阿妹嗰張係子母牀）
係咁嘅，我哋呢邊有term break，咁就啱啱放完啦。但係term break期間就多咗一個我表姐嘅同學過咗嚟（佢讀女校，亦都係香港人），亦都陪咗我哋一個禮拜（過夜）。一開頭嗰三日（星期六-星期一）佢中咗covid，星期一好返。佢全個禮拜都瞓咗喺我阿妹間房度，咁我阿妹唯有焗住同我瞓啦。我知道我自己一個瞓張雙人牀唔應該投訴，因為喺香港同阿妹分上下格床，喺呢邊算幸福。不過放假嘅呢一個禮拜，我就俾我阿妹騷擾咗一個禮拜。咁點樣嘅騷擾呢？我平時自己瞓張雙人牀，都唔會用到咁多位，不過加咗我阿妹喺度，突然間變到好迫😢 呢一個禮拜，我經歷咗無數咁多次嘅半夜三間俾佢打（佢發緊夢？），碌咗幾次落牀，佢個枕頭夜晚飛咗落我塊面度令到我唞唔到氣，等等。呢啲平時都唔會發生，再加上我間房裝飾到都幾靚下，自己都會盡量保持整齊嘅感覺，俾我阿妹完全破壞晒，我好嬲，不過又奈佢唔何😞 次次同阿媽投訴都只會換來一句「將就吓啦」。
我哋依家就好似真係變咗我表姐個同學嘅host family (??)，聽講佢應該term break，放假都會喺我哋度過（除咗暑假佢返香港）。我覺得點解既然係我表姐嘅同學，亦都係佢close friend(best friend?) ，點解唔由佢哋兩個一齊瞓呢，何況我表姐張牀仲大過我嗰張，話晒佢嗰張係king-sized，我嗰張只係double。佢個同學中咗covid我明白，佢需要自己一個獨立係一間房，不過好返之後呢？？完全令到我放假根本就唔似放假咁。我知道我阿妹其實都唔係想特別同我一齊瞓，但係佢又冇乜所謂。但係我好想講，我好有所謂！！我覺得自己呢個禮拜私人空間完全冇晒，我咁難得放長少少嘅假（因為冇農曆新年假放），我仲要咁辛苦喺度捱？我間房亂晒個樣會令到我好唔舒服（但係我又唔覺得自己潔癖😅），我哋間屋又唔係特別大，無啦啦好地地做人哋host family做乜？係，我阿媽會俾返少少錢我同我阿妹，話係「你哋兩個咁合作讓咗間房出嚟俾佢，算係咁啦」。我想講唔係錢嘅問題，而係我個人空間同埋我自己嘅舒適感問題。我阿妹咁舒服咁（佢平時間房亂到我都唔係好接受唔到），我朝朝都喺度執牀執櫃桶，佢呢？我阿妹喺度攤喺我張牀度乜都唔喺度做，喺度碌佢本手提電腦😑 點解好似變到我仲辛苦過佢😒
咁樣又何謂呢？對唔住 發現自己打咗篇好長嘅文😅 亦都知道自己應該感恩過到嚟英國，生活空間大咗，自由度高咗，不過我真係從來冇諗過要咁樣🙇🏻♀️ 阿媽仲要係咁話我自己唔識感恩🙁 應該珍惜自己有嘅嘢🤨 都唔知點算好，我嘗試同佢解釋我自己唔舒服嘅感覺，不過當佢話返我轉頭嘅時候我又反駁唔到，唯有接受佢係啱嘅，不過自己好唔服（？？) 同埋我唔係唔鍾意我表姐個同學，佢其實人都幾好，只不過係唔滿意依家嘅居住情況啫…
辛苦晒大家，希望呢一波疫情會好轉～
辛苦晒 admin ( •̀ᴗ•́ )و ̑̑
大家加油！💛