#NSS家庭
[guest] 我真係好憎我阿媽
首先，我阿媽係一個出軌既女人。
講真句佢都已經四十幾五十幾歲人，有兩個仔女，個仔已經接近二十九，個女又十幾歲就黎成年，佢仲係度玩埋d咩交友app，扮哂三十幾歲嘅女人係度溝仔，然後仲要真係約人出黎拍拖，係度攬身攬頸影住自己d錫錫相（我都係無意中係佢手機到睇到，真係好嘔心），而當中令我最氣憤嘅係因為出軌呢件事搞到我老豆身體變得好差，精神衰弱，身體多左好多病痛。
我老豆真係好辛苦，日做夜做自己一個撐起一頭家養活四個人，仲要向銀行借錢供我阿哥去外國讀書，自己死慳爛慳去還錢，之後仲要自己出錢投資開間小舖頭比我阿媽去做，入貨錢租舖頭錢都係我老豆出。
個陣我老豆好信任佢好愛佢，一出糧就過哂d錢比我老母，自己只係留一部分，唔係自己用，而係還比銀行（供我阿哥去讀書個筆），佢投資開個間小公司個戶口又落我媽名，唯獨交租份合約先落自己名，即係有乜好野就益我老母，衰嘢就會留返比自己，但係而家我老母就當哂d野係自己既，極度忘本，成日話咩間公司係佢嘅d錢係佢嘅，仲係我同阿哥面前講大話賣慘話所有錢都係佢自己出（我老豆有keep低所有帳單證明），但其實難聽d講句，佢咪只係一個sales，間舖頭係我老豆開嘅，身為售貨員既你賺到幾多錢都好d錢都係公司架啦，係咪？
然後當初供我阿哥讀書嘅錢係我老豆出，我阿媽就當哂係自己辛勞付出咁，話咩咁辛苦賺錢養大佢，所以要求我阿哥比一半人工比佢（注意係比佢唔係比屋企）做家用完全唔過份，先唔好講一半人工做家用會唔會太多，比你已經有問題啦？仔又唔係你養嘅，點解佢要比錢你？係都比老豆啦係咪呀？
真係好心疼我老豆娶左個咁既老婆返黎
第二，我老母從來冇關心過我。
由細細個開始佢已經唔係好照顧我，我生活嘅大小事都扔哂比我老豆管，不如先講下我老母係點樣疏忽照顧我嘅
以前我老母好賭成性，好在只係網上面賭下遊戲幣，唔係賭真錢。細個我眼睛成日發炎要滴眼藥水舒緩，有一次我搵佢幫我滴眼藥水嘅時候，佢就因為掛著打麻將game，就是但拎支類似眼藥水既物體就幫我滴，滴落去個刻辣到我隻眼痴線，聽到我大喊既時候，佢先發現佢滴左aa膠落我隻眼到，好彩即刻送去醫院冇盲到，個陣我仲讀緊幼稚園，但呢件事真係印象好深刻，所以記到而家。
其次，佢又係d好懶嘅人，懶到連陪我出席校內活動都唔願意，寧願係屋企訓覺打機。小學嘅時候，每次我上堂拎獎，其他得獎者同學d阿媽都好以佢地為榮係咁係台下幫佢地影相，落左台又會攬實佢地，讚佢地好叻，得我一個係冇阿媽陪，我估佢仲係屋企打緊機訓緊覺呢。佢連家長日都懶得出席，要我老豆連續返完五日工之後，仲要星期六早起陪我去家長日，連書亦都叫我老豆假日幫我溫，佢就日日遊手好閒，直至後尾我老豆開左間舖頭比佢先有返d嘢做
第三，我老母眼中只有錢，我對佢黎講亦都只係一筆生意投資。
由細到大，佢下下都只係識同我講錢，先係我阿哥要比二分一人工，到我就係無論我學d咩，補習都好，佢都會同我計住計住，比好多好難聽嘅說話我聽：
「你睇下你，補習用左我幾多錢？你大個又比幾多錢人工返黎呀？」
「你呀而家洗我咁多錢大個要比三分二人工我呀」
「你除左問我拎錢之外仲識乜？你大個又有幾多回報比我？」
「點解要比錢你補習？你大個又會比返幾多錢我？」
每一次問佢拎補習錢，都會聽到類似咁既說話，反正係佢眼中只係得個錢字，就好似養兒防老咁，或者呢個字都唔太岩用，因為佢連養都唔願意養我，就算佢肯比錢我補習，d錢都係我老豆嘅，唔係佢嘅
第四，我老母好野蠻，覺得自己乜都岩，覺得自己大哂。
我身為一個女仔，閂房門有返自己私隱有錯咩？平時又唔關心我，但係又樣樣都要要管住哂，佢唔比我閂門做自己嘢，但其實我閂門係有以下原因：
1. 我地全家不幸中左omicron，而家居家隔離緊，為左保護自己，保護屋企人，係屋企入面戴口罩應該算係正常掛，全屋得佢一個冇帶，咁我閂房門保護自己都係正常姐，偏偏佢又好鍾意門都唔敲就開我房門，仲要鬧我閂房門做咩，咁我係自己房都會帶口罩雙重保護嘅，但有時候可能食緊嘢，佢入到黎鬧鬧鬧既時候d口水噴哂落我d飯到，就唔太衛生lor
2. 我日日上緊online lesson嘅時候，佢就係出門睇電視打機，仲要播到好大聲，嚴重阻住我上堂，咁我閂房門隔下音又唔得咩？就算我唔係上緊堂都好，我想做下自己嘢，想閂門有返自己私隱，又有錯咩？
第五，我老母脾氣好暴躁。
佢日日對住屋企人發脾氣，特別係我老豆同埋我，而我老豆係最慘嘅，比人戴帽，又比人呃晒d錢，仲比人搶晒功勞，而家更要受佢氣，日日係屋企無理取鬧，無事生非，仲要經常性點人做嘢，要人幫佢煮宵夜，仲要人幫佢洗埋碗，而佢自己少少家務都唔做，仲要成日話其他人對屋企冇付出，明明對屋企最冇貢獻個個係佢呢，毫不誇張，佢真係咁多年黎一份家務都冇做過，好似事不關己咁
第六，我老母虐到寵物，成日做好多不人道嘅嘢。
我屋企隻狗係佢拎返黎養嘅，但佢唔單止完全冇照顧過隻狗，仲要虐待佢，例如將自己著完嘅臭襪（佢一個禮拜沖一次涼，我發誓我冇誇大過，佢隻腳臭到同佢隔一個位都聞到個種）套住我隻狗個鼻，隻狗一整跌隻襪就打佢，我老母又會將佢隻腳擺係我隻狗身上面，隻狗一走又打佢，佢仲會專登捉實隻狗唔比佢走，隻狗一表示不滿（例如嗚嗚叫/宜起排牙）我老母又會打佢。
我同埋我屋企人唔係冇阻止過，只係佢太強勢，我地無能為力，我多次因為想保護隻狗，叫我老母唔好再咁做，最後佢鬧埋我一份，打埋我一份，鬧我咁多管閒事做乜，鬧我佢做乜關我咩事，叫管好自己先啦，我亦有嘗試抱走隻狗，但我老母只會變本加厲對我隻狗更加差。
以上只係我老母其中嘅一些惡行，對於佢嘅蠻橫無理，公主病，不人道行為，我真係越黎越睇唔過眼，更加越黎越忍受唔到，我知道我好不孝，畢竟係佢懷胎十月生我落黎，但我真係控制唔到對佢既憎恨，奈何我反抗唔到，亦都未有能力帶埋我老豆，我隻狗一齊搬出去住，提供優質嘅生活比佢地，所以其實我都好憎自己嘅無能，好憎自己咁冇用。
我亦都知道我已經好幸福，畢竟好多人可能連三餐溫飽都係問題，又有好多人可能父母唔健在，所以寫呢篇文出黎唔係想講自己有幾慘，我一直都知道自己已經好幸福，都有好珍惜現有嘅生活，我只係想發洩自己心中既不快，希望自己打完篇文之後冇咁負面，順便問下咁多位網友我可以點樣做/應該點樣做，希望大家屌得細力d，sorry for 1999